अमेरिकाबाट सुरक्षा ग्यारेन्टी पाइने अपेक्षाबारे यस्तो भन्छन् जेलेन्स्की

किभ । युक्रेनको पूर्वी मोर्चामा भीषण लडाइँ भइरहँदा अमेरिका र युक्रेनबिच खनिज सम्झौतामा हस्ताक्षर गर्ने तयारी भइरहेको छ । युक्रेनी राष्ट्रपति भोलोडिमिर जेलेन्स्की खनिज सम्झौतामा हस्ताक्षर गर्न अमेरिका आउन लागेको भनेर अमेरिकी राष्ट्रपति डोनल्ड ट्रम्पले भनेका पनि छन् ।

तर, युक्रेनले अहिलेसम्म सम्झौताबापत कुनै सुरक्षा ग्यारेन्टी नपाएको जेलेन्स्कीले बुधबार भनेका छन् ।‘म सुरक्षा ग्यारेन्टीबारे कुनै न कुनै टिप्पणी चाहन्थेँ र त्यहाँ (वार्तामा)मा यो हुनु आवश्यक छ,’ उनले भने ।

ट्रम्पले सुरक्षा ग्यारेन्टी दिएनन् भने उनी वार्ताबाट बाहिरिन्छन् त भनेर बीबीसीले जेलेन्स्कीलाई सोधेको पनि थियो । यसको जवाफमा उनले आफूले नेटोको सदस्यता वा यो जस्तै अन्य कुनै बाटो चाहेको बताएका थिए ।

आफूहरूलाई कुनै सुरक्षा ग्यारेन्टी दिइएन भने युद्धविराममा नजाने उनले स्पष्ट पारेका थिए । सुरक्षा ग्यारेन्टी नै नपाएपछि आफूहरूलाई अरू केही पनि काम नलाग्नेमा उनले जोड दिएका थिए ।