अमेरिका र युक्रेनबीच फेरि वार्ता हुने, जेलेन्स्कीले यस्तो भने ?

एजेन्सी । युक्रेनी राष्ट्रपति भोलोडिमिर जेलेन्स्कीले अर्को हप्ता साउदी अरेबियामा अमेरिकासँग वार्ता हुने बताएका छन् । उनले युक्रेनले जतिसक्दो चाँडो स्थायी शान्तिका लागि काम गरिरहेको बताए । यो महत्वपूर्ण बैठक हुने उनले आशा व्यक्त गरेका छन् ।

अमेरिकी राष्ट्रपति डोनाल्ड ट्रम्पका विशेष दूत स्टिभ विटकफले अमेरिकी टोलीले रुस-युक्रेन युद्ध अन्त्य गर्न शान्तिका लागि रोडम्याप छलफल गर्न चाहेको बताए।

गत शुक्रबार ह्वाइट हाउसमा जेलेन्स्की र ट्रम्पबीच चर्को बहस भएको थियो । जसमा ट्रम्पले जेलेन्स्की लडाइँ अन्त्य गर्न तयार नभएको बताएका थिए ।

यसैबीच अमेरिकाले युक्रेनलाई दिँदै आएको सैन्य सहायता रोकेको छ र गुप्तचर सूचना आदान प्रदान गर्न बन्द गरेको छ ।

युक्रेनी राष्ट्रपतिले घटनाप्रति दुःख व्यक्त गर्दै देशको सबैभन्दा ठूलो सैन्य आपूर्तिकर्ता अमेरिकासँगको सम्बन्ध सुधार गर्न प्रयासरत रहेको बताए ।