यस्तो छ नेकपा एसका नेताहरुको कार्य विभाजन प्रस्ताव, कसलाई कुन जिम्मेवारी ?

काठमाडौं । नेकपा एकीकृत समाजवादीको महाधिवेशन सकिएको ५ महिनापछि केन्द्रीय कमिटीको कार्य विभाजन प्रस्ताव पेश भएको छ । स्थायी कमिटीको जारी बैठकमा लामो रस्साकस्सीपछि नेताहरुको कार्य विभाजन प्रस्ताव पेश भएको हो ।

एकजना पदाधिकारीले नेपाल प्रेसलाई दिएको जानकारी अनुसार तीन नेताको बलियो दाबी रहेको संगठन विभाग प्रमुख पूर्व महासचिव बेदुराम भुसालले पाएका छन् । यो विभागमा महासचिव घनश्याम भुसाल र बरिष्ठ उपाध्यक्ष राजेन्द्र पाण्डेको समेत दावी थियो ।

अध्यक्ष माधवकुमार नेपालले बेदुरामलाई संगठन विभाग दिन लागेका हुन् । बरिष्ठ उपाध्यक्ष राजेन्द्र पाण्डे मोर्चा संगठनको इन्चार्ज बन्ने भएका छन् । प्रचार विभाग प्रमुख प्रकाश ज्वाला प्रस्ताव गरिएका छन् । तर ज्वालाले पनि मोर्चा संगठनमा दावी नछाडेका कारण यसको अन्तिम टुंगो भने लागेको छैन ।

सम्मानित नेता झलनाथ खनाल विदेश विभाग र स्कुल विभाग प्रमुखमा प्रमेश हमाल प्रस्ताव भएको स्रोतले जनाएको छ । त्यस्तै नेकपा एसले ७ वटा प्रदेशका इन्चार्ज पनि बैठकमा प्रस्ताव गरेको छ ।

प्रस्ताविक इन्चार्जमध्ये कोशीमा जगन्नाथ खतिवडा,मधेशमा धर्मनाथ साह,वागमतीमा डा।गंगालाल तुलाधर,गण्डकीमा श्रीनाथ बराल,लुम्बिनीमा सोम प्रसाद पाण्डे,कर्णालीमा चन्द्रवहादुर शाही र सुदूरपश्चिममा भानुभक्त जोशी छन् । महासचिव घनश्याम भुसालले प्रस्ताव गरेको कार्य विभाजन प्रस्तावमा अध्यक्ष माधव नेपालले व्यापक हेरफेर गरेका कारण नेताहरुबीच अझै सहमति बन्न नसकेको बताइएको छ ।