चितवनमा प्लाज्मा थेरापीको पहिलो प्रयास नै असफल, प्लाज्मा दिइएकी संक्रमित महिलाको मृत्यु

चितवन । कोरोना भाइरस (कोभिड १९) संक्रमितलाई गम्भीर अवस्थामा गरिने उपचार पद्धति प्लाज्मा थेरापीको चितवनमा भएको पहिलो प्रयास नै असफल भएको छ । हेटौँडाकी एक संक्रमित महिलालाई प्लाज्मा दिइएको २४ घण्टा नबित्दै उनको मृत्यु भएको छ ।

शुक्रबार मकवानपुर, हेटौँडा–११ की एक कोरोना सङ्क्रमित महिलाको चितवन मेडिकल कलेज भरतपुरमा मृत्यु भएको हो ।  हेटौँडा उपमहानगरपालिका वडा नम्बर–११ की ५२ वर्षकी महिलाको प्लाज्मा चढाइएको थियो ।

अस्पतालका निर्देशक डा। दयाराम लम्सालका अनुसार बिहीबार राति दुई पोका ‘बी पोजेटिभ’ प्लाज्मा चढाइएको र शुक्रबार दिउँसो १ः४४ बजे सङ्क्रमित महिलाको मृत्यु भएको हो ।

निमोनिया भएर भदौ १० गते अस्पताल भर्ना भएकी उनमा ११ गते कोरोना सङ्क्रमण पुष्टि भएको थियो । अस्पतालको आइसियूमा उपचारको क्रममा मृत्यु भएको हो । संक्रमित महिलाको अवस्था गम्भीर भएपछि बिहीबार राति डा. शीतल अधिकारी र डा. दयाराम लम्सालको टिमले प्लाज्मा थेरापी गरेको थियो ।

कोरोनाबाट मृत्यु हुने २१ पुगे
चितवनमा उपचारको क्रममा मृत्यु हुने कोरोना सङ्क्रमितको संख्या २१ पुगेको छ । मृतक २१ मध्ये १६ जना ५० वर्ष उमेर काटेका छन् । चितवनवासीमात्रै ११ जना छन् । मृतकमध्ये भरतपुर वडा नं–११ का मात्रै चार जना छन् । मृतकमध्ये १० जना महिला रहेका छन् ।

मृतक सङ्क्रमितमध्ये सबैभन्दा कम उमेरकी भरतपुर–११ की १८ वर्षकी र सबैभन्दा बढी उमेर खैरहनीकी १०१ वर्ष उमेरकी वृद्धासम्म रहेका स्वास्थ्य कार्यालय प्रमुख दीपक तिवारीले जानकारी दिए ।