विराटनगरलाई ४ विकेटले पराजित गर्दै चितवन दोस्रो चरणमा प्रवेश

पोखरा । विराटनगरलाई ४ विकेटले पराजित गर्दै चितवन राईनोज दोस्रो चरणमा पुगेको छ । पोखरा प्रिमियर लिगको आज भएको दोस्रो खेलमा विराटनगर टाईटन्समाथि जित निकाल्दै लिगको दोस्रो चरणमा प्रवेश गरेको हो ।

टस जितेर पहिला व्यटिङ गरेको विराटनगर टाईटन्सले १ सय ४५ रन जोडेको थियो । १ सय ४६ रनको लक्ष्यसहित ब्याटिङ गरेको चितवनले ३ बल बाँकी रहदै लक्ष्य भेटाएको थियो । चितवनको जितमा सन्नी पटेलले २४ बलमा सर्वाधिक ५१ रन जोडेका थिए । त्यस्तै आरिफ शेख ३९ बलमा ३५ रन जोडे । चितवनका लागि स्मिथ पटेलले २५ बलमा २१ रनको योगदान दिएका थिए ।

प्रतियोगितामा पोखरा पल्टन र काठमाडौँ रोयल्स दोस्रो चरणमा प्रवेश गरिसकेका छन् । पहिलो स्थानमा रहेको पोखरा पल्टन सिधै फाईनलमा प्रवेश गरिसकेको छ । भोली आईतबार हुने दोस्रो चरणको खेलमा काठमाडौँ रोयल्स र चितवन राईनोज भिड्ने छन् । उक्त खेलको विजेताले फाईनलमा पोखरा पल्टनको सामाना गर्नेछ ।

 कात्तिक ९ गतेबाट सुरु भएको पोखरा प्रिमियर लीग (पीपीएल) टी–२० क्रिकेट प्रतियोगिता कात्तिक २० गतेसम्म चल्नेछ । विजेताले २७ लाख रुपैयाँ र ट्रफी एवं उपविजेताले १० लाख रुपैयाँ प्राप्त गर्नेछन् ।