बालुवाटारमा मध्यरात बसेको सुरक्षा संन्यत्रको बैठकमा के भयो ?

काठमाडौं । पूर्वराजावादीहरूले काठमाडौंमा प्रर्दशन गरेको भोलिपल्टै प्रधानमन्त्रीले मन्त्रिपरिषद्को बैठक बोलाएका थिए । फागुन २६ गते सोमबार बसेको मनित्रपरिषद्को बैठकले पूर्व राजावादीहरुले राष्ट्रिय एकता र सामाजिक सद्भाव भड्काउन खोजेको निश्कर्ष निकालेको थियो ।

त्यसपछि बुधबार (हिजो) प्रधानमन्त्री निवास बालुवाटारमा सुरक्षा संन्यत्रको बैठक बस्यो । साँझ ६ बजेदेखि प्रधानमन्त्री निवास बालुवाटारमा बसेको सुरक्षा संन्यत्रको बैठक अवेर रातीसम्म चलेको थियो । बैठकमा खासगरी पूर्वराजावादीहरुले गरिरहेको गतिविधिलाई नै मध्यनजर गरेर छलफल भएको बैठकमा सहभागी स्रोतले बताएको छ ।

दुई तिहाईको सरकारको नेतृत्व गरिरहँदा पनि जनताको अपेक्षा अनुसार सरकारले काम नगरिरहेको र त्यसको प्रतिफल प्रतिगामी शक्तिहरुले चलखेल बढाउन खोजेको विपक्षी दलका नेताले समेत संसदको रोष्टममा उभिएर खबरदारी गरेपछि भने प्रधानमन्त्रीले लामै समिक्षा गर्ने गरी सुरक्षा संन्यत्रको बैठक बोलाएका थिए ।

प्रचण्डले बुधबार संसदमा एकातिर सरकारको गलत क्रियाकलापविरुद्ध र अर्कोतिर प्रतिगामी चलखेलकाविरुद्ध एकैसाथ जुध्नुपर्ने विशिष्ट परिस्थिती आएको भन्दै राजावादीहरुको प्रतिवाद र सरकारमाथी प्रश्नैप्रश्न गरेका थिए ।

‘विपक्षीले पनि सरकारमाथी प्रश्नैप्रश्न उठाउने, पूर्व राजावादीहरुको चलखेल पनि बढ्ने र सरकार निरिह जस्तो देखिएको जनआवाज पनि आउन थालेपछि समग्र स्थितीको समिक्षाका लागि सुरक्षा संन्यत्रको बैठक बसिएको हो,’ बैठकमा सहभागी स्रोतले भन्यो–‘सरकारले अव राजावादीहरुका गतिविधिलाई तत्काल नजिकबाट निगारानी राख्ने र गणतन्त्रविरुद्ध गतिविधि बढाउन खोजे राजनीतिक र प्रशासनिक प्रतिवाद नै गरेर जाने निश्कर्षमा पुगेको छ ।’

सुरक्षा संन्यत्रको बैठकमा यही विषयमा केन्द्रीत भएर छलफल भएको स्रोतले बतायो । बैठकमा प्रधानमन्त्री केपी ओली, गृहमन्त्री रमेश लेखक, नेपाली सेनाका प्रधान सेनापति महारथी अशोकराज सिग्देल, शसस्त्र प्रहरी महानिरीक्षक राजु अर्याल, नेपाल प्रहरीका बसन्त कुंबर र राष्टिय अनुसन्धान प्रमुख हुतराज थापा लगायतको उपस्थिती थियो ।

बैठकमा प्रतिपक्षी दल माओवादी केन्द्र लगायत समाजवादी मोर्चाले चैत १५ मा काठमाडौंमा गणतन्त्रका पक्षमा गर्न लागेको जनप्रर्दशनका विषय पनि छलफलका क्रममा उठेको थियो ।

तत्काल पूर्वराजावादीहरुको गतिविधि निगारानी नगर्ने र राजनीतिक र प्रशासनिक प्रतिवाद नगर्ने हो भने राजावादीहरुले चलखेल बढाउन सक्ने र त्यसमा छिमेकीहरुको एउटा समुहको साथ लिनसक्ने तिर पनि सचेत हुनुपर्ने निश्कर्ष निकालेको स्रोतको भनाई छ ।

पूर्वराजावादीहरूले प्रदर्शन गरेकै दिन २५ फागुनदेखि लागू हुने गरी जिल्ला प्रशासन कार्यालय काठमाडौंले दुई महिनाका लागि राजधानीका केही संवेदनशील क्षेत्रमा निषेधाज्ञा जारी गरेको छ । निषेधाज्ञाका बारेमा पनि छलफल छ ।

पूर्व राजाले राजाकै रुपमा सम्वोधन गर्ने, उनलाई राजावादीहरुले त्यही रुपमा प्रस्तुत गर्ने , राष्टिय झण्डा आन्दोलनमा प्रयोग गर्ने लगयतका काम गरेकोमा पनि संन्यत्रको बैठकमा कुरा उठेको थियो । संविधानतः यी कुरा गर्न नपाईने र राष्टिय झण्डाको दुरुपयोग गर्न नपाइन विषयमा पनि बैठकमा कुरा उठेकोले त्यसरी पूर्व राजावादीहरुले झण्डाको दुरुपयोग गरेको विषय रोकेर जाने सम्मका छलफल समेत भएको बताइएको छ ।