विभिन्न स्थानमा भएका सवारी दुर्घटनामा तीन जनाको मृत्यु

काठमाडौँ । विभिन्न जिल्लामा भएका सवारी दुर्घटनामा परेर ३ जनाको मृत्यु भएको छ । धनकुटा, कञ्चनपुर र मोरङमा भएका सवारी दुर्घटनामा परेर तीन जनाको मृत्यु भएको हो । 

धनकुटाको धनकुटा नगरपालिका–३ निगालेस्थित सडकमा प्रदेश १–०४–००१ च १३३६ नम्बरको पिकअप र प्रदेश १–०२–०५३ प ३१६८ नम्बरको मोटरसाइकल एक आपसमा ठक्कर खाई आइतबार साँझ दुर्घटना हुँदा मोटरसाइकलमा सवार मोरङ सुन्दरहरैचा नगरपालिका–२ बस्ने ३२ वर्षीय सुमन सुवेदीको मृत्यु भएको छ । दुर्घटनामा गम्भीर घाइते भएका उनको जिल्ला अस्पतालमा उपचारको क्रममा मृत्यु भएको हो । पिकअप चालकलाई प्रहरीले नियन्त्रणमा लिएको छ ।

त्यस्तै, कञ्चनपुरको कृष्णपुर नगरपालिका–५ चीनी मिलस्थित सडकमा सुपप्र ०१–००९ प ३७७७ नम्बरको मोटरसाइकलको ठक्करबाट पैदल यात्री सोही नगरपालिका–६ सिंहपुर बस्ने ५६ वर्षीय हेमराज चौधरीको मृत्यु भएको छ ।

आइतबार साँझ मोटरसाइकलको ठक्करबाट गम्भीर घाइते भएका उनको सेती प्रादेशिक अस्पताल धनगढी कैलालीमा थप उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार २ जनाको निमेश अस्पताल गुलरीया कञ्चनपुरमा उपचार भइरहेको छ ।

उता, मोरङको उर्लाबारी नगरपालिका–९ खोपिडाँडास्थित सडकमा बोर्डर लाइनबाट आमबाडीतर्फ आउँदै गरेको मे–९ प ५५७५ नम्बरको मोटरसाइकल अनियन्त्रित भई आइतबार साँझ दुर्घटना हुँदा मोटरसाइकलमा सवार झापा दमक नगरपालिका–१० बस्ने २२ वर्षीय धनराज रिजालको मृत्यु भएको छ ।

दुर्घटनामा गम्भीर घाइते भएका उनको अरनिको अस्पताल उर्लाबारीमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकलाई थप उपचारको लागि बिएण्डसी अस्पताल बिर्तामोड रिफर गरिएको छ । सबै दुर्घटनाका सम्बन्धमा प्रहरीले आवश्यक अनुसन्धान  भैरहेको जानकारी दिएको छ ।