अदालतको आदेशले कालोसूचिका ठेकेदार कारबाही गर्न सकिएन : मन्त्री यादव

काठमाडौं। भौतिक पूर्वाधार तथा यातायातमन्त्री रेणुकुमारी यादवले अदालतको आदेशका कारण कालो सूचिमा रहेका ठेकेदारहरुलाई कारबाही गर्न नसकिएको स्पष्टिकरण दिएकी छन् ।

मन्त्री यादवले अदालतको आदेशकै कारण हुलाकी राजमार्गको हजारौं ठाउँको काममा अवरोध भइरहेको पनि जिकिर गरिन् । बुधबार मन्त्रालयको विनियोजित बजेटमाथिको छलफलमा सांसदहरुले उठाएका प्रश्नको जवाफ दिने क्रममा उनले अदालतले कुरै नबुझी आदेश दिएका कारण कालोसूचिमा रहेका ठेकेदारहरुले उन्मुक्ति पाउने गरेको गुनासो गरिन् ।

‘ठेकेदारलाई कालो सूचिमा राख्दा अदालतमा मुद्धा हालिन्छ । अहिले भर्खरै एउटा पुलको हामीले कालो सूचिमा राख्यौं । अदालतमा गए । अदालतले उसलाई फेरी रोक्का गरिदियो । अब मन्त्रालयले के गर्छ ? अहिले हुलाकी सडकको हजारौं ठाउँमा काम अवरोध छ मुआब्जाको कारण स्टेअर्डर भएर बसेको छ’ उनले भनिन् ।

मन्त्री यादवले हुलाकी राजमार्ग निर्माणका लागि जग्गाको मुआब्जाको विषयमा अदालतले आदेश दिएकाले त्यहाँको हजारौं ठाउँको काम अघि बढन नसकेको बताइन् । ‘अदालतले कुरा नबुझी एकै छिनमा स्टेअर्डर गर्दाखेरि टुक्राटुक्रा सडकहरु हाम्रो बन्न सकेको छैन’ मन्त्री यादवले भनिन् ।