सम्पत्ति जोगाउन देउवाको शरणमा पुगे म्यानपावर व्यवसायी

काठमाडौँ । गत साता नेपाली कांग्रेसका सभापति शेरबहादुर देउवाको निवासमा आयोजित पार्टी प्रवेश कार्यक्रममा तत्कालीन नेकपा एमालेनिकट दुई म्यानपावर व्यवसायी नेपाली कांग्रेसमा प्रवेश गरेका छन् ।

म्यानपावर व्यवसायी भिम रोक्का र बलभन्द्र ढकाल कांग्रेस पार्टीमा प्रवेश गरेका हुन् । उनीहरु दुवै जना अवैध सम्पत्ति जोगाउन कांग्रेसमा प्रवेश गरेको समाचार स्रोतको दाबी छ ।

याक्का ओभरसिजका सञ्चालक रहेका रोक्काले अख्तियार दुरुपयोग अनुसन्धान आयोगका पूर्व प्रमुख आयुक्त दीप बस्न्यातको सम्पत्ति चलाउँदै आएका छन् । पूर्व आयुक्तका छोरा कमल बस्नेत उनका पार्टनर नै हुन् । रोक्काको नाममा अकुत सम्पत्ति जम्मा गरेको सुराकीका आधारमा सम्पत्ति शुद्धिकरण अनुसन्धान विभागले छानबिन गरिरहेको छ । नेकपाका नेताहरुले चासो नदिएपछि उनी कांग्रेस प्रवेश गरेको स्रोत बताउँछ ।

बस्नेतले करोडौं सम्पत्ति थुपारे पनि आफ्नो र परिवारको नाममा राखेका छैनन् । त्यसमध्ये धेरै रोक्काकै नाममा रहेको छ । सोही आधारमा विभागले रोक्काको सम्पत्ति समेत छानबिन गरिरहेको छ ।

प्रोटिच नेपाल मेनपावरका सञ्चालक ढकालको सम्पत्ति पनि विभागले छानबिन गरिरहेको छ । उनले पनि सम्पत्तिको स्रोत खुलाउन सकेका छैनन् । तर, सम्पत्ति शुद्धीकरण अनुसन्धान विभागले फाइल तामेलीमा राख्न नमानेपछि उनी पनि कांग्रेसमा प्रवेश गरेका छन् ।