काठमाडौँ । सत्तारुढ दल नेपाली कांग्रेसले विद्यालय शिक्षा विधेयक शिक्षक महासंघसँग विगतमा भएका सम्झौताअनुसार छिटो आउनुपर्ने बताएको छ । देशभरका शिक्षकहरुले काठमाडौँमा अहिले विद्यालय शिक्षा विधेयक जारी गर्न माग गर्दै आन्दोलन गरिरहेका छन् ।
सरकारले संसदको हिउँदे अधिवेशनबाट शिक्षा विधेयक पारित गर्ने भनेपनि पारित नगरी अधिवेशन अन्त्य गरेको छ । शिक्षकहरुको आन्दोलनसँगै नेपाली काँग्रेसले शिक्षक संघ संगठनसँग विगतमा भएका सम्झौताहरु अक्षरशः कार्यान्वयन गर्दै यथाशिघ्र विधेयक पास हुनुपर्ने बताएको छ ।
न्युज एजेन्सी नेपालसँगको कुराकानीमा नेपाली कांग्रेसका शिक्षा विभाग प्रमुख नैनसिंह महरले शिक्षकहरुसँग सरकारले विगतमा गरेका सम्झौता कार्यान्वयनको ग्यारेन्टी लिनुपर्ने र यथाशिघ्र संसदबाट विधेयक पारित गर्नुपर्ने बताए ।
उनले संसदले कानून निर्माण गर्ने सवालमा अकर्मण्यता देखाएको आरोप लगाउँदै विद्यालय शिक्षा विधेयक बनाउनका लागि सबैले सम्झौता गरेर अघि बढ्न जरुरी रहेको बताए । शिक्षाको प्रारम्भिक बालविकासदेखि उच्च शिक्षासम्म भ्वाङ परेको उल्लेख गर्दै यसलाई सुधार गर्नेगरी विधेयक ल्याउनुपर्नेमा जोड दिए । सबैले अधिकार मात्रै खोज्ने नभइ कर्तव्यवोध गर्न जरुरी रहेको उल्लेख गरे ।
उनले भने, ‘सरकारले हिजो शिक्षक महासंघसँग भएका सम्झौताहरु कार्यान्वयनको ग्यारेन्टी गर्नुपर्छ । त्यो बिल यथाशक्य संसदबाट हामी पास गर्छौं । समिति र उपसमितिले यो बीचमा पनि काम गर्नुपर्छ । सँगै संसद अन्त्य छ, संसद गैरजिम्मेवार हुनुभएन । संसदले कानून निर्माण गर्ने सवालमा जुन अकर्मण्यता देखाएको छ, त्यसलाई सुधार गर्नुपर्छ । हरेक इण्डिभिजुअल व्यक्तिगत सांसद पनि आज कानून निर्माणका बारेमा बोलिरहेको छैन । सदनमा कुरा उठाएका छैनन् । महासंघमा जो आन्दोलन चलेको छ, उहाँहरुले पनि सबैका मागहरु शतप्रतिशत पूरा हुने म देख्दिन । अहिले जस्तो नेपालको संविधान बनाएका छौँ, त्यस्तै किसिमको विधेयक बनाउनका लागि सबैले एग्रिमेण्ट गर्ने हो भने विधेयक आउला ।
कांग्रेसका शिक्षा विभाग प्रमुख समेत रहेका महरले शिक्षक संघ संगठनसँग नेपाल सरकारले विगतमा शिक्षा विधेयक यथाशिघ्र पास गर्नेदेखि शिक्षा भित्रका सुधारका बारेमा भएका सम्झौताको अक्षरशः पालना हुनुपर्छ भन्ने कांग्रेसको धारणा र अडान रहेको जिकिर गरे । संघीय लोकतान्त्रिक गणतन्त्रको संविधान बनाइकेपछि संसदहरुले बनाउनुपर्ने कानूनहरु ३ सय भन्दा बढी रहेको उल्लेख गर्दै यथाशिघ्र उक्त कानूनहरु बनाउनुपर्ने बताए । सडकमा भइरहेको शिक्षकहरुको आन्दोलनबारे सरकार र सदन बेखबर बन्न नहुने उनको भनाइ छ ।
उनले भने, ‘शिक्षक संघ संगठनसँग नेपाल सरकारले विगतमा शिक्षा विधेयक यथाशिघ्र पास गर्नेदेखि लिएर जति शिक्षा भित्रका सुधारका बारेमा एग्रिमेण्ट गरेको छ, त्यसको अक्षरशः पालना हुनुपर्छ भन्ने काँग्रेसको धारणा र अडान हो । संघीय लोकतान्त्रिक गणतन्त्रको संविधान बनाइकेपछि संसदहरुले बनाउनुपर्ने कानूनहरु हाम्रो ३ सयभन्दा बढी बाँकी छन् । संविधानलाई ब्याक अप गर्ने एउटा थिति बसाउने, जनतालाई अलिकति सहुलियत व्यवहारमा लैजाने, सुशासन कायम गर्ने सवालका समेत कानूनहरु छन् । अख्तियारको कानून आज ५ वर्ष भइसक्यो संसदमा छ, पास हुन सकेको छैन । यस्ता विधेयक र कानुनहरु निर्माण गर्ने सवालमा संसद आज व्यक्तिगत र पार्टीगत तवरबाट अलिकति अयोग्यताको शिकार हुँदैछन् जस्तो मलाई लागिरहेको छ । आज पनि त्यही भइरहेको छ । एक वर्षअघि शिक्षक महासंघसँग भएको सम्झौता उनीहरुका वर्गीय सवाल, उनीहरुको वृत्ति विकासको सवाल र सँगै समग्र शिक्षा प्रणालीको सवालमा सबै किसिमका शिक्षकहरुको व्यवस्थापनदेखि लिएर अभिभावक, विद्यार्थीका लागि एउटा राम्रो गुणस्तरीय शिक्षा प्रदान गर्ने एउटा लक्ष्य छ ।’
महरले फास्ट ट्रयाकमा शिक्षा पारित गरेर शिक्षकहरुका माग सम्बोधन गर्न आग्रह गरे । संसदको बजेट अधिवेशन सुचारु भएको एक हप्ताभित्रै शिक्षा विधेयक पारित गर्नेगरी अघि बढ्नुपर्नेमा जोड दिए ।
प्रतिक्रिया दिनुहोस
सफल खबर संवाददाता
शुक्रबार, २२ चैत्र २०८१, ११ : ४८
लेखकबाट थप
सम्बन्धित समाचारहरु
सरकारले पूर्वराजालाई शाही निसान प्रयोग नगर्न भन्नुपर्यो : रामहरि खतिवडा
कांग्रेस केन्द्रीय कार्यसम्पादन समिति बैठक आह्वान
कांग्रेस पदाधिकारी बैठक बुढानीलकण्ठमा सुरु
रास्वपा सांसदको अभिव्यक्तिप्रति कांग्रेस नेताको आपत्ति, कानूनी उपचारमा जाने चेताव
आन्दोलनरत विद्यार्थीले हटाए नेविसंघले धनगढीमा राखेका झन्डा
कांग्रेसमा ४० वर्ष मुनिका युवाहरूको सहभागिता सुनिश्चित गर्न माग