दाङको मुसोटमा जीप दुर्घटना हुँदा १ जनाको मृत्यु, ४ जना घाइते

बुटवल । दाङको घोराही सडक खण्डस्थित मुसोटमा जीप दुर्घटना हुँदा १ जनाको मृत्यु भएको छ भने ४ जना घाइते भएका छन् । 

कपिलवस्तुको कृष्णनगरबाट दाङको तुल्सीपुरतर्फ आउँदै गरेको रा १ च ९६६२ नम्बरको बोलेरो जीप अनियन्त्रित भएर घोराही उपमहानगरपालिका वडा नं. ३ मुसोटमा आज बिहान दुर्घटनामा भएको हो । जीप अनियन्त्रित भइ भित्तामा ठोक्किएको थियो । 

दाङका प्रहरी प्रवक्ता डिएसपी सुमित खड्काका अनुसार दुर्घटनाका घाइतेमध्ये तुसीपुर उपमहानगरपालिका वडा नं. १५ निवासी १६ वर्षीय पदम वलीको उपचारका क्रममा मृत्यु भएको हो । राप्ती स्वास्थ्य विज्ञान प्रतिष्ठान घोराहीमा उपचारका क्रममा बिहीवार बिहान वलीको मृत्यु भएको हो ।

दुर्घटनामा परेर तुलसीपुर १५ का २६ वर्षीय देवराज वली र २४ वर्षीय गोपाल श्रेष्ठ गम्भीर घाइते भएका छन् । गम्भीर घाइते दुबै जनालाई थप उपचारका लागि बाँकेस्थित कोहलपुर मेडिकल कलेज रिफर गरिएको खड्काले जानकारी दिए । चालकको अवस्था भने सामान्य रहेको छ ।