समाजलाई केन्द्रीकृत गर्न सहकारीको ठूलो योगदान छ : खानेपानीमन्त्री मगर

कञ्चनपुर । खानेपानीमन्त्री बीना मगरले विकेन्द्रित भईरहेको समाजलाई केन्द्रीकृत गर्न सहकारी संस्थाहरुले ठूलो योगदान दिईरहेको बताउनुभएको छ । 
कञ्चनपुरको पुनर्वास नगरपालिकामा अवस्थित दलित बहुउद्देश्यीय सहकारी संस्थाको २१ औं वार्षिक साधारण सभाको उद्घाटन गर्दै खानेपानी मन्त्री मगरले समाजलाई केन्द्रीकृत गरी सहकारी संस्थाहरुले सकारात्मक सन्देश दिईरहेको बताउनुभएको हो । 

साधारण सभाको उद्घाटन गर्दै उहाँले भन्नुभयो, “हाम्रो समाज विकेन्द्रित भईरहेको छ । यस्तो अवस्थामा सामुहिकतामा काम गर्ने अभ्यास सहकारी संस्थाहरुले गरिरहेका छन् । सामुहिक लगानी, सामुहिक उपलब्धि र समस्याको सामुहिक हल खोज्ने राम्रो माध्यम सहकारी बनेको छ ।”

उहाँले समुदायका व्यक्तिहरुलाई एकै ठाउँमा गोलबन्द गरी सहयोगको भावना जागृत गराउन सहकारीले महत्वपूर्ण संस्कार अँगालेको बताउनुभयो । सामुहिकतामा काम गर्ने अभ्यास सहकारीले गरेको भन्दै उहाँले विपन्न वर्गका समुदायको जीवनस्तर माथि उकास्न सहकारीको भूमिका अतुलनीय रहेको जिकिर गर्नुभयो । सहकारीलाई नकारात्मक ढंगबाट मात्रै नबुझ्न उहाँले सबैलाई आग्रह गर्नुभयो ।