तत्काल परिणाममुखी काम गर्न नसके कमान्ड फिर्ता गर्ने सशस्त्रका आईजीको चेतावनी

काठमाडौं। सशस्त्र प्रहरी महानिरीक्षक राजु अर्यालले कमान्डमा जान लागेका बाहिनीपति तथा तालिम शिक्षालयका समादेशकहरूलाई तत्काल परिणाममुखी काम गर्न नसके जुनसुकै बेला कमान्डबाट फिर्ता गर्ने चेतावनी दिएका छन् ।

सोमबार मुख्यालयमा निर्देशन दिँदै उनले सशस्त्र प्रहरीको बर्दी चम्काउने कि यसलाई धूमिल पार्ने भन्ने जिम्मा उनीहरूकै हातमा रहेको बताए । उनले संवेदनशील भएर आफ्नो जिम्मेवारी पूरा गर्न निर्देशन दिए ।

देशको सार्वभौमसत्ता, सीमा सुरक्षामा शून्य गल्तीमा काम गर्न र राजश्व संकलनका लागि २४ घण्टा सक्रिय रहन निर्देशन दिँदै महानिरीक्षक अर्यालले ‘मेरो संगठन’ भनेर काम गर्न, लोभलालचमा नफस्न र संगठनको नीति नियम अनुसार काम गर्न निर्देशन दिए । 

‘देश र समाजका लागि गौरव गर्न लायक काम गर्न सक्नु भएन भने र व्यक्तिगत लोभलालचमा फस्नु भयो भने तपाईंलाई कुनै शक्तिले पनि बचाउन सक्दैन, त्यसको हेक्का राख्नुहोला’, उनले भने । 

उच्च मनोबलका साथ देखिने गरी र महसुस हुने गरी काम गर्न तथा आफूले गरेका कार्य प्रगति प्रत्येक महिना मुख्यालय पठाउन अर्यालले निर्देशन दिए ।

मातहत कर्मचारीले गल्ती गरे सम्बन्धित बाहिनीका बाहिनीपतिहरूलाई कारबाही गर्ने चेतावनी दिँदै महानिरीक्षक अर्यालले बाहिनीदेखि गण, गुल्मसम्मका स्थायी कार्यालयहरूको प्रत्येक ३/३ महिनामा कमान्डको पुनरवलोकन तथा पुनर्मूल्यांकन गरिने र त्यसमा कमजोर देखिए कमान्ड हेरफेर तथा फिर्तासम्म गरिने बताए ।

महानिरीक्षक अर्यालले समुदायलक्षित विपद् स्वयंसेवक तालिम अझ प्रभावकारी रूपमा तत्काल सञ्चालन गर्न नयाँ कल्याणकारी योजना ल्याउन र पुराना कल्याणकारी कार्यलाई निरन्तरता दिन तथा एक महिनाभित्र सबै कमान्डरले आफ्नो कार्ययोजना मुख्यालयमा पठाउनसमेत निर्देशन दिए । 

सीमावासीसँग सशस्त्र प्रहरी कार्यक्रम अझ प्रभावकारी बनाउँदै लैजान तथा समुदायमा विपद् रोकथामका लागि सबै सरोकारवाला निकायसँग समन्वय र सहकार्य गर्दै कार्य गर्न निर्देशन दिँदै महानिरीक्षक अर्यालले बर्दीको साख जोगाउन बताए । 

संगठनलाई कुनैपनि तरिकाबाट दाग लगाउने कार्य सैह्य नहुने उनको भनाइ छ । ‘राजश्व चुहावट नियन्त्रणमा निर्मम बन्न र कानूनमा जे छ सोही अनुसार गर्नुहोस् । तपाईंलाई त्यसमा कुनै अर्को विकल्प छैन, गलत मनसाय राख्नुभयो भने त्यसको प्रत्यक्ष निगरानी मुख्यालयले गर्छ । त्यसमा बढी ध्यान दिनुहोला’, महानिरीक्षक अर्यालले भने ।