डोल्पाका स्थानीय तह काठमाडौं महानगरसँग जोडिँदै

काठमाडौं। डोल्पाको सेफोक्सुण्डो गाउँपालिका र छार्का ताङ्सोङ् गाउँपालिकाका जनप्रतिनिधिहरूले काठमाडौं महानगरपालिकाका उपप्रमुख सुनिता डंगोलसँग भेटघाट गरेका छन् । डंगोलसँगको भेटपछि कृषि उत्पादनमार्फत् सम्बन्ध राख्न उत्साहित भएको उनीहरूले बताएका छन् ।

महानले कार्यान्वयनमा ल्याएको एग्रो पुलिङ् कार्यक्रमका विषयमा छलफल गर्दै उनीहरूले विभिन्न जातका जडिबुटी, फापर, सिमी, आलु, दूध, मासु, ऊन, पश्मिनालगायत लत्ताकपडा काठमाडौंलाई दिन सकिने बताए ।

यसबाट स्थानीयको आयमा वृद्धि हुने बताउँदै उनीहरूले डोल्पाबाट धेरैले धेरै लिएको तर थोरै दिएको बताए । तर, महानगरको कार्यक्रमबाट लिनेदिने बराबरी हुने उनीहरूको भनाइ थियो ।

छलफलमा छार्का ताङ्सोङ् गाउँपालिकाका अध्यक्ष सेनाङ् गुरुङ्, सेफोक्सुण्डो गाउँपालिकाका अध्यक्ष धावा सम्डुक गुरुङ्सहित वडाध्यक्षहरू, रोजगार संयोजक र स्वास्थ्यकर्मीको टोली थियो ।

महानगरले वितरणमुखी सहयोगभन्दा सेवामूलक सम्बन्धबाट नागरिक तहमा लाभ पुग्नेगरी सहयोग गर्ने नीतिमा रहेको उपप्रमुख डंगोलले बताइन् । ‘एग्रो पुलिङ् हामीले कार्यान्वयनमा ल्याएको कार्यक्रम हो ।

यसबाट डोल्पाका नागरिकलाई आर्थिक लाभ हुन्छ । काठमाडौंका नागरिकले ताजा खाद्यान्न तथा तरकारी प्राप्त गर्नुहुनेछ,’ उनले भनिन्। एग्रो पुलिङ् कार्यक्रममार्फत् महानगरपालिकाले सबै स्थानीय तहसँग सहकार्य गर्न सक्ने उनको भनाइ थियो । 

कुराकानीका क्रममा छार्का ताङ्सोङ् गाउँपालिकाका अध्यक्ष गुरुङ्ले ठुलो भूगोल र पातलो बस्ती हुनु नै पालिकालाई विकास वितरण र व्यवस्थापनमा कठिन भएको धारणा राखे । ‘आफ्नै ठाउँमा उद्यम गरेर बसाइसराइै रोक्न सके पनि ठुलै उपलब्धि हुने थियो । यस्ता कार्यक्रम चलाउन महानगरपालिकाबाट सहयोगको अपेक्षा गरेका छौँ,’ उनले बताए ।