एक वर्षभित्र बुटवल–नारायणगढ सडकको निर्माण पूरा हुन्छ : प्रधानमन्त्री ओली

काठमाडौं। प्रधानमन्त्री केपी शर्मा ओलीले एक वर्षभित्र बुटवल-नारायणगढ सडकको निर्माण कार्य पूरा हुने बताएका छन् । २०८३ मंसिरभित्र सम्पन्न गर्नेगरी निर्माण कार्य पुनः प्रारम्भ भएको उनले बताए ।

चीन भ्रमणबाट स्वदेश फर्किने क्रममा बिहीबार त्रिभुवन अन्तर्राष्ट्रिय विमानस्थलमा पत्रकारले सोधेको एक प्रश्नको जवाफमा ओलीले २०८३ मंसिरभित्र सम्पन्न गर्नेगरी बुटवल-नारायणगढ सडकको काम पुनः प्रारम्भ हुने बताएका हुन् ।

‘पुनः प्रारम्भ भइसकेको छ, निर्माण कार्य । अथवा केही दिनमा शुरू हुन्छ । २०८३ मंसिर भित्रमा निर्माण कार्य पूरा हुन्छ । त्यो सहमति भएको छ’ ओलीले भने । बुटवल-नारायणगढ सडक निर्माणको काम चिनियाँ ठेकेदार कम्पनी चाइना स्टेट कन्ट्रक्सनले पाएको छ ।

चीन भ्रमणमा जानुअघि ओलीले मंसिरभित्र काम शुरू नगरे ठेक्का तोड्ने चेतावनी दिएका थिए । त्यसलगत्तै चिनियाँ ठेकेदार कम्पनीले काम शुरू गरेको छ । २०७९ साउनमै सम्पन्न हुनुपर्ने सो सडकखण्डको काम ५० प्रतिशत पनि पूरा भएको छैन ।