होलीको विवाद बल्झिँदा कलंकीमा 'ग्याङ फाइट' : एक जनाको मृत्यु, २० पक्राउ

काठमाडौ। काठमाडौंको कलंकीस्थित एलआरआई स्कुल नजिकै मेलिसा मार्गमा सोमबार भएको दुईपक्षीय झगडामा एक जनाको मृत्यु भएको छ । मृत्यु हुनेमा दोलखा घर भएर काठमाडौंको ढुंगेअड्डा बस्ने २२ वर्षीय अभय तामाङ छन् ।

जिल्ला प्रहरी परिसर काठमाडौंका प्रवक्ता एसपी अपिल राज बोहराका अनुसार होलीमा भएको विवादले झगडाको रूप लिएको अनुसन्धानबाट खुलेको छ । दुवै समूहका युवाहरू खुकुरी र रड बोकेर हानाहान गरेका थिए ।

रड प्रहारबाट घाइते भएका अभयको कलंकीस्थित शहीद मेमोरियल अस्पतालमा उपचारका क्रममा मृत्यु भएको हो । झगडामा मकवानपुर घर भई पुरानो नैकापमा बस्ने चक्रे भन्ने पवन तामाङ, चन्द्रागिरि घर भएका २२ वर्षीय पासाङ तामाङ शेर्पा र नागढुङ्गा बस्ने २३ वर्षीय सन्दीप भुजेल घाइते भएका छन् ।

उनीहरूको शहीद मेमोरियल र ओम समाज अस्पतालमा उपचार भइरहेको एसपी बोहराले दिए । घाइतेहरूको टाउकोलगायत शरीरका अन्य भागमा चोटपटक लागेको छ ।

एसपी बोहराका अनुसार पक्राउ परेका २० जनाको ‘स्क्रिनिङ’ भइरहेको छ । ‘प्रहरी तत्काल घटनास्थलमा पुगेर २० जनालाई नियन्त्रणमा लिएको छ, घटनामा को–को संलग्न थिए भनेर स्क्रिनिङको काम भइरहेको छ,’ बोहराले भने, ‘झगडामा संलग्न युवाहरूको आनीबानी पहिल्यैदेखि राम्रो नभएको सूचना प्रहरीले पाएको छ ।’ 

तामाङलाई ज्यान मार्ने उद्देश्यले नै आक्रमण गरेको प्रहरीले जनाएको छ ।