चक्रवाती आँधी फेङ्गल आज तमिलनाडु-पुडुचेरीको तटमा आइपुग्ने

एजेन्सी । बंगालको खाडीमा उत्पत्ति भएको चक्रवाती आँधी फेङ्गल आज दिउँसो तमिलनाडु र पुडुचेरीको तटमा पुग्ने सम्भावना छ । धेरै तटीय क्षेत्रहरूमा वर्षा सुरु भएको छ । तमिलनाडुको महाबलीपुरममा शुक्रबार समुद्रमा उच्च छालहरू देखिएका थिए।

प्रदेश सरकारले विद्यालय तथा कलेजहरुमा बिदा दिने र माछा मार्नेहरुलाई समुद्रमा नजान चेतावनी दिएको छ । भारतीय मौसम विज्ञान विभाग (आईएमडी)का अनुसार यो आँधी आज दिउँसो तमिलनाडु र पुडुचेरीको तटमा पुग्नेछ।

‘चक्रवाती आँधी फेङ्गल बंगालको खाडीको दक्षिण-पश्चिमी भागमा, चेन्नईको २१० किलोमिटर दक्षिण पूर्वमा छ,’ आईएमडीले भन्यो, ‘यो आँधी पश्चिम र उत्तर-पश्चिम सर्नेछ। शनिबार, नोभेम्बर ३० मा, यो पुडुचेरी नजिकै कराइकल र महाबलीपुरम बिचको उत्तर तमिलनाडु-पुडुचेरी तटहरू हुँदै जान्छ।’

यस अवधिमा हावाको गति ७० देखि ८० किलोमिटर प्रतिघण्टादेखि ९० किलोमिटर प्रतिघण्टासम्म रहने आईएमडीले बतायो । धेरै ठाउँमा भारी वर्षाको सम्भावना रहेको छ ।

तमिलनाडु र पुडुचेरीमा प्रशासनले उच्च सतर्कता घोषणा गरेको छ र कुनै पनि प्रकारको परीक्षा वा विशेष कक्षाहरू सञ्चालन नगर्न भनिएको छ।