उद्योग सञ्चालनको उपयुक्त वातावरण बनाउन जरुरी छः मुख्यमन्त्री लामा

हेटौँडा । बागमती प्रदेशका मुख्यमन्त्री बहादुर सिंह लामाले नेपालमा उद्योग सञ्चालनको उपयुक्त वातावरण नरहेको टिप्पणी गरेका छन् । उद्यमीले लगानीका लागि योजना तयार गर्दा नै राज्य तथा समुदाय स्तरबाटै समस्या हुन गरेको उनले बताए ।

१० औँ उद्योग दिवसको अवसरमा हेटौँडामा आयोजित नवप्रवर्तन उद्यमी सम्मान कार्यक्रमलाई सम्बोधन गर्दै मुख्यमन्त्री लामाले लगानीकर्ताहरूलाई नागरिक र सरकारबाटै विभिन्न कारण देखाउँदै आक्रान्त बनाइरहेको बताए । उद्योग सञ्चालनको लागि नागरिक स्तरबाटै सहयोग गरी उपयुक्त वातावरण तयार गरिनु पर्ने उनको भनाइ छ ।

बागमती प्रदेश सरकारले उद्योग क्षेत्रलाई प्रोत्साहनका लागि उपयुक्त नीति तयार गरिने उनले बताए । असमान नीतिहरूलाई परिमार्जन गरेर प्रदेशमा उद्योगमैत्री वातावरण तयार पार्न प्रदेश सरकार प्रतिबद्ध रहेको उनले बताए । उद्योग क्षेत्रको विकासका लागि तीन तहको सरकारको समन्वय अपरिहार्य रहेको उनले बताए ।

‘सरकारले उद्योग क्षेत्रलाई प्रोत्साहन प्राथमिकतामा राखेको छ । दायित्वका रूपमा सरकारले उद्योग क्षेत्रको विकासलाई अघि बढाएको छ । उद्योग क्षेत्र युवा पलायन रोक्न र रोजगारी सृजनाको प्रमुख आधार हो,’ मुख्यमन्त्री लामाले भने ।

विदेशी प्रविधि र उत्पादनसँग प्रतिस्पर्धा गर्नु नेपाली उद्योगको प्रमुख चुनौतीको रूपमा रहेको मुख्यमन्त्री लामाले बताए ।