लोकरिझ्याँईको राजनीति गलत हो : मन्त्री गुरुङ

काठमाडौँ । सञ्चार तथा सूचना प्रविधिमन्त्री पृथ्वी सुब्बा गुरुङले लोकरिझ्याँईको राजनीति गलत भएको बताएका छन् । बुधबार काठमाडौँमा विशिष्ट चलचित्रकर्मी परिचयपत्र वितरण समारोहलाई सम्बोधन गर्दै उनले यस्तो बताएका हुन् ।

मन्त्री गुरुङले नेपाली समाज नै ढोगी बनिरहेको उल्लेख गर्दै के बोल्दा तत्काल ताली बज्छ त्यही मात्रै बोल्ने क्रमको विकास भएको बताए । उनले कलाकारको बिचमा पुग्दा पनि कलाकार थिएँ भन्ने र मजदुरको कार्यक्रममा जाँदा पनि मजदुर नेता थिएँ जस्ता लोकरिझ्याँईका अभिव्यक्ति दिनु नहुने बताए ।

मन्त्री गुरुङले नेपालमा मन्त्री हुनलाई कुनै योग्यता नै नचाहिने भन्दै निर्वाचन जितेपछि र पार्टी एवं नेताको नजरमा परेपछि मन्त्री बन्ने परम्परा गलत रहेको बताए । सही पात्र नपाउँदा देश विकास हुन नसकेको उनको भनाइ छ । उनले विषय विज्ञहरूलाई सम्बन्धित मन्त्रालयको जिम्मेवारी दिनुपर्ने बताए ।

उनले भने, ‘हाम्रो समाज नै ढोगी समाज भयो । समाज एकदम ढोगी समाज छ । मैले के बोलिदिँदा तत्काल ताली आउँछ, त्यही मात्रै भनिदिने । भोलिको दिन के काम गर्नुपर्छ भन्नेकुरा बिर्सिने । हामी जस्ता नेताको काम त्यही भइरहेको छ । त्यसकारण यो ढोगी चिजहरु नगरौँ भन्ने मान्यता मेरो हो ।’