दीपावलीको अवसर पारेर ‘पूर्ण बहादुरको सारङ्गी’ रिलिज

काठमाडौँ । आज बिहीबारबाट फिल्म ‘पूर्ण बहादुरको सारङ्गी’ सार्वजनिक प्रदर्शनमा आएको छ । नयाँ फिल्म शुक्रबार रिलिजको परम्परा भएपनि दीपावलीको अवसर पारेर यो फिल्म आजैबाट प्रदर्शनमा आएको हो । यद्यपि देशभरका फिल्म हल यो फिल्मले मात्र पाएको छैन । दसैँमा रिलिज भएका दुई फिल्म ‘१२ गाउँ’ र ‘छक्का पन्जा ५’को प्रदर्शन अझै जारी छ ।

धेरै फिल्म भएपनि ‘पूर्ण बहादुरको सारङ्गी’ले शो भने राम्रै पाएको छ । फिल्मले देशभर १ सय २० हाराहारी शो पाएको छ । देशकै ठुलो मल्टीप्लेक्स चेन क्यूएफएक्सले काठमाडौँसहित आफ्नो दशवटा आउटलेटमा फिल्मलाई ३८ शो दिएको छ ।

त्यस्तै, दोस्रो ठुलो मल्टीप्लेक्स आईएनआईले फिल्मलाई तीनवटा आउटलेटमा ९ शो दिएको छ भने काठमाडौँका वान सिनेमाजले दुईवटा आउटलेटमा ६ शो, एफक्यूब, बिएसआर मुभिज र बिग मुभिजले समान ३/३ शो, रञ्जना सिनेप्लेक्स र सिडिसी सिनेमाजले समान ५/५ शो र कीर्तिपुर सिनेमाजले २ शो दिएका छन् ।  तिहारमा पाँच दिन भएकोले फिल्मको व्यवसाय राम्रो हुने अपेक्षा गरिएको छ ।

सरोज पौडेलले निर्माण गरेको ‘पूर्ण बहादुरको सारङ्गी’ गन्धर्व समुदायको कथामा आधारित फिल्म हो । फिल्ममा विजय बराल, अञ्जना बराइली, मुकुन भुषाल, बुद्धि तामाङ, देशभक्त खनाल लगायतको समेत अभिनय छ ।