भारतीय राजदूतले दिल्लीबाट फर्केलगत्तै किन भेटे कांग्रेस सभापति देउवा ?

काठमाडौं । नेपालका लागि भारतीय राजदूत नविन श्रीवास्तवले कांग्रेस सभापति शेरवहादुर देउवासँग भेटवार्ता गरेका छन् ।

केही दिन अगाडी मात्रै नेपालको विकसित राजनीतिक घटनाक्रमका बारेमा नयाँ दिल्लीको सरकारसँग अपडेट गराउन दिल्ली पुगेका राजदूत श्रीवास्तव शुक्रबार मात्रै स्वदेश फर्केका थिए ।

भारतमा रहँदा विदेशसचिव सहित भारतका विदेश मन्त्रालयका उच्चपदस्थ अधिकारीहरुसँग भेटघाट गरेर राजदूत श्रीवास्तव नेपाल फर्केका थिए । नेपालमा राजावादीहरुको काठमाडौंमा प्रर्दशन भएकै दिन आइतबार साँझ राजदूत देउवालाई भेटन उनकै निवास बुढानिलकण्ठ पुगेका थिए । आइतबार साँझ राजदूत साँझ साढे ५ वजे बुढानिलकण्ठ पुगेको र त्यहाँ काग्रेस सभापति देउवासँग झण्डै दुई घण्टा छलफल गरेर फर्केको देउवा निकट स्रोतले बताएको छ ।

देउवासँगको भेटमा दुई देशबीचको सम्बन्ध, आपसी सहकार्य तथा वर्तमान राजनीतिक विषयहरूबारे छलफल भएको बताइएको छ। देउवा निकट स्रोतले भेटमा नेपाल–भारत सम्बन्धलाई थप मजबुत बनाउने विषयमा कुराकानी भएको दावी गरेको छ । यद्यपि, भेटको विस्तृत विवरण सार्वजनिक गरिएको छैन।

भारतीय राजदूत श्रीवास्तव दिल्लीबाट फर्केलगत्तै उच्चस्तरीय राजनीतिक भेटघाटमा सक्रिय हुन थालेका हुन् । त्यही क्रममा उनले देउवालाई पहिलो प्राथमिकता दिएर भेट गरेका हुन् ।

नेपालमा उत्तर प्रदेशका मुख्यमन्त्री योगी आदित्यनाथसँग पूर्व राजा ज्ञानेन्द्रको केही समय अगाडीको भेट, लगत्तै ज्ञानेन्द्रले फागुन ७ मा दिएको वक्तब्य र त्यसपछि हिन्दुबादी र राजावादीहरुको काठमाडौंमा भएको संयुक्त प्रर्दशन लगायतमा भारतले पूर्व राजालाई कतै न कतै ग्रीन सिंग्नल दिएको हुनसक्ने आशंका ब्याप्त भईरहँदा राजदूतको देउवासँगको भेट भएको हो ।

सन्र्दभ राजावादीहरुको प्रर्दशनकै दिन भएर भएको भएपनि नेपालको वर्तमान सरकार र दिल्लीका बीचमा बढिरहेको दुरीका विषयमा पनि देउवासँगको छलफलमा सम्वाद भएको बताइएको छ । राजदूत श्रीवास्तवले दिल्ली पुगेर फर्केलगत्तै देउवासँग भएको भेटलाई अर्थपूर्ण रुपमा लिनुपर्ने राजनीतिक विश्लेषकहरु बताउँछन् ।