दुई दलीय व्यवस्थाका लागि सरकारले अध्यादेश ल्याउन लागेको हो : माधव नेपाल

काठमाडौँ । नेकपा एकीकृत समाजवादी पार्टी अध्यक्ष माधवकुमार नेपालले सरकारले दुई दलीय व्यवस्थाका लागि अध्यादेश ल्याउन लागेको बताएका छन् । पूर्व प्रधानमन्त्री नेपालले प्रधानमन्त्री केपी शर्मा ओलीले काँग्रेस-एमालेको फाइदाका लागि अध्यादेश ल्याउन लागेको भन्दै काँग्रेसलाई भ्रममा राख्दै एमाले बलियो बनाउन लागेको बताएका हुन् ।

समाजवादी प्रेस संगठन नेपाल कास्कीद्वारा सोमबार पोखरामा आयोजित पत्रकार भेटघाट कार्यक्रममा उनले यसअघि सरकारले आवश्यकताका लागि अध्यादेश ल्याएको बताए । ‘अहिले आवश्यकभन्दा पनि पूर्वाग्रहका साथ ल्याउन लागिएको हो, ‘नेपालले भने, ‘उ बेला पार्टीभित्रको ठूलो हिस्सा अन्यायमा परेको थियो । जनता सडकमा उत्रिएका थिए । त्यस बेला न्याय चाहिएको थियो । अहिले कुनै बाध्यता छैन । स्थिति छैन । तर, सरकारलाई समाजवादी पार्टी फुटाउनु छ ।’

नेपालको राजनीति र नेपालको मौसम उस्ता उस्तै रहेको भन्दै पूर्वानुमान गर्नै नसकिने उनले व्यङ्ग्य गरे । अहिलेको सरकार काम गर्नेभन्दा पनि बोल्ने मात्र रहेको बताए । ‘जनताको पीडा सम्बोधन र समाधानमा सरकार इमानदारीका साथ लागेन, ‘उनले थपे, ‘पदमा पनि सरकार देखिएन ।’ जनप्रतिनिधि निवास, सरकारी भवन निर्माणमा नै केन्द्रित रहेको उनको भनाइ थियो । पोखरा क्षेत्रीय अन्तर्राष्ट्रिय विमानस्थललगायत १६ वटा विमानस्थल, भ्युटावर, गाउँपालिका-नगरपालिका र वडाका भवन, पालिकाभित्रका अस्पताललगायतमा अनावश्यक लगानी भएको उनले बताएका छन् ।

समाजवादी यात्रा गर्दा रोजगारी, सुशासन, उत्पादन, देशका परियोजना विचार पुर्‍याइ तय गर्ने, बजारको व्यवस्थापन र मूल्यांकन गर्ने बताउँदै नेपालले माओवादीसँग एकताको सम्भावना रहेको र एमालेसँग कल्पना नै गर्न नसकिने उनको भनाइ थियो । सहकारपीडितका मुद्दालाई तत्काल सम्बोधन गर्नुपर्ने उनले बताए । ‘दोषीलाई उन्मुक्ति र निर्दोष नफसोस् भन्ने हो, ’उनले थपे ।

नजिकिँदै गरेको उपनिर्वाचनमा पनि समाजवादी एक्लै चुनाव लड्ने र यसका लागि उम्मेदवार तयार भएको उनले बताए । दसौँ महाधिवेशनपछि पार्टी नयाँ सोचबाट अघि बढाउँदै आएको भन्दै उनले निर्वाचनले कतिपयलाई समेट्न नसकिएको बताए । पार्टीको प्रदेश अधिवेशनको तयारी भएको र जिल्लाको पनि क्रमशः गर्दै जाने उनको भनाइ छ ।