नेप्से सूचक ७५.३३ अंकले बढ्यो, १४ अर्बमाथिको कारोबार

काठमाडौँ । लगातारको सेयर बजारको वृद्धि मंगलबार पनि रोकिएन । अघिल्लो दिन सामान्य २ अंकले नेप्से बढेकोमा मंगलबार ७५.३३ अंकले बढ्दै २५ सय ६३.४३ विन्दुमा उक्लिएको छ । यो २९ महिना यताकै उच्च विन्दु हो ।

यसअघि २०७८ चैत अन्तिममा नेप्से सूचक २५ सयको विन्दुमा थियो । मंगलबार कारोबारमा समेत उच्चता आउँदै १४ अर्ब ११ करोड ६३ लाख रुपैयाँ बराबरको ३ करोड ९७ लाख कित्ता सेयर दोस्रो बजारमा कारोबार भएको छ ।

सबैभन्दा बढी शिभम् सिमेन्टको २४ करोड ६९ लाख २३ हजार रुपैयाँ बराबरको सेयर कारोबार भएको छ भने अपी पावर कम्पनीको २४ करोड २६ लाख १२ हजार रुपैयाँ बराबरको र हिमालयन रिइन्स्योरेन्सको २३ करोड २ लाख ६४ हजार रुपैयाँ बराबरको सेयर कारोबार भएको छ । 

मंगलबार बोटलर्स नेपाल, संवृद्धि फाइनान्स कम्पनी, माण्डू हाइड्रोपावर, हाथ्वे इन्भेष्टमेन्ट नेपाल र नेपाल वेरहाउस कम्पनीको सेयर मूल्य समान १० प्रतिशतले बढेको छ भने दर्जनभन्दा बढी कम्पनीको सेयर मूल्य ८ प्रतिशतमाथिले बढेको छ । 

१३ वटा उपसूचकमध्ये मंगलबार सबैभन्दा बढी ट्रेडिङ समूहको उपसूचक ५.०६ प्रतिशतले बढेको छ भने जीवन बीमा समूहको ४.४५ प्रतिशतले र निर्जीवन बीमा समूहको उपसूचक ४.३७ प्रतिशतले बढेको छ । अरू बाँकी १० वटा उपसूचक १ प्रतिशतमाथिले बढेका छन् ।