मुम्बईमा भवन भत्किँदा १ महिलाको मृत्यु, १३ जना घाइते

एजेन्सी । भारतको मुम्बईस्थित ग्रान्ड रोड क्षेत्रमा रहेको रुबिना मन्जिल नामक भवन भत्किँदा एक महिलाको मृत्यु भएको छ ।
उक्त भवनको कौसीको केही भाग भत्किएर अन्य १३ जना घाइते भएको बृहान् मुम्बई नगरपालिका (बीएमसी)ले जनाएको छ । उक्त घटना शनिबार बिहान ११ बजे ‘ग्रान्ट रोड रेलवे स्टेशन’ नजिक भएको हो ।

‘दोस्रो र तेस्रो तल्लाको केही भाग र माथिल्लो चार तले संरचना आंशिक रूपमा भत्किएको र केही भाग भत्किन लागेको छ,’ बीएमसीले विज्ञप्ति जारी गरी जानकारी गराएको छ । 

यस घटनामा कम्तीमा सात-आठ जना बासिन्दा चार–तले भवनको माथिल्लो तलामा फसेका र उनीहरूको मुम्बई फायर ब्रिगेड, प्रहरी, एम्बुलेन्स र कर्मचारी र नागरिकको सहयोगमा उद्धार कार्य शुरू गरिएको छ । 

‘कौसीको केही भाग भत्किँदा एक जनाको मृत्यु भएको र १३ जना घाइते भएका छन् । उनीहरूलाई स्थानीय अस्पतालमा लगिएको छ । यहाँ एक महिलालाई मृत घोषित गरिएको र अन्यको उपचार भइरहेको छ,’ मुम्बई प्रशासनले जनाएको छ ।

महाराष्ट्रमा लगातारको वर्षाले मुम्बईलाई ठप्प बनाएको छ । वर्षा र डुवानले सार्वजनिक यातायात सेवाहरू अवरुद्ध भएको र असङ्ख्य यात्रुलाई असुविधा भएको जनाइएको छ । 

महाराष्ट्रका उपमुख्यमन्त्री देवेन्द्र फडणबीसले नागपुरमा वर्षापछिको अवरोधको आँकलन र प्रशासनलाई सतर्क रहन निर्देशन दिएका छन् ।