राप्रपा नेपालको निम्तो मान्न पुगे लिङ्देन

काठमाडौं । राष्ट्रिय प्रजातन्त्र पार्टी (राप्रपा) ले पहिलोचोटि आफूबाट फुटेर बनेको राप्रपा नेपाललाई राजनीतिक मान्यता दिएको छ । राप्रपा अध्यक्ष राजेन्द्र लिङ्देनले आज राप्रपा नेपालले आयोजना गरेको कार्यक्रममा गरिएको निम्तो स्वीकार गरे ।

चैत १५ गतेको आन्दोलनपछि पक्राउ गरिएका नेता कार्यकर्ताको रिहाइलाई मुख्य मुद्दा बनाएर आज राप्रपा नेपालले रत्नपार्कमा विरोध सभा आयोजना गरेको हो । यसमा राप्रपाले सबै राजावादी दल र संघ-संगठनलाई निम्त्याएको थियो । राप्रपा अध्यक्ष लिङ्देन लगायत प्रमुख नेताहरूलाई राप्रपा नेपालका अध्यक्ष कमल थापा आफैँले फोन गरेर निम्त्याएका थिए । उनको निम्तो स्वीकार्दै पहिलोपटक लिङ्देन राप्रपा नेपालको कार्यक्रममा पुगे ।

उनी कार्यक्रममा केही ढिलागरी उपस्थित भएका थिए । आउनसाथ उनी मञ्चमा उक्लिएर भाषण गरे । आजै पोखरा विमानस्थलबारे संसदीय समितिको प्रतिवेदन हस्तान्तरण गर्ने कार्यक्रम भएकाले समयमा आइपुग्न नसकेको प्रष्टीकरण लिङ्देनले दिए ।

‘यस्तो महत्वपूर्ण कार्यक्रममा झण्डै वञ्चित भएँ, तर म भगवानमा आस्था राख्ने मान्छे, ठिक टाइममा आइपुगेको छु, अत्यन्त हर्षित छु,’ उनले भाषणको सुरुवातमै भने । लिङ्देनले राजसंस्था र हिन्दू राष्ट्र पुन:स्थापना तथा संघीयता खारेजीका लागि गरिने सबै प्रकारका कार्यक्रमहरूमा पार्टीको ऐक्यवद्धता रहने बताए । आफ्ना मान्यताहरू स्थापनाका लागि हुने सबै प्रकारको शान्तिपूर्ण कार्यक्रममा साथमा हुने वचन दिए ।

‘आज यो कार्यक्रम राप्रपा नेपालले आयोजना गरेको छ र यसका अध्यक्ष श्रद्धेय दाइ कमल थापाले मलाई आमन्त्रण गर्नुभयो, उहाँलाई धन्यवाद तथा आभार व्यक्त गर्न चाहन्छु र आफ्नो ऐक्यवद्धता व्यक्त गर्न चाहन्छु,’ लिङ्देनले भने ।

सबै राजावादी शक्तिहरु एकजुट हुनुपर्ने दवाव बढिरहेका बेला लिङ्देनले आफू यसका लागि तयार रहेको जनाउ दिए । उनले भने, ‘मलाई धेरै भन्नु छैन । यति भन्नु छ, हामी सँगै छौं र सबैसँग मिलेर काम गर्न राप्रपा तयार छ । यसमा कुनै द्वीविधा नरहोस् ।’

लिङ्देनले थपे, ‘अहिले सिंगो देशले हामीलाई आशाको नजरले हेरिरहेको छ । म सबै देशभक्त शक्तिहरुलाई आग्रह गर्न चाहन्छु । सबै आग्रह–पूर्वाग्रह त्यागेर एक ठाउँमा बसेर निकास दिन अगाडि बढौं । यो कार्यका लागि राप्रपा सँधै तयार छ । हामी सबै एक ठाउँ बसेर यो लोकतन्त्र नामको लुटतन्त्र विरुद्ध जुटौं ।’

थुनामा रहेका पार्टीका नेताहरूको रिहाइ र चैत १५ को घटनाको न्यायिक छानबिनका लागि सशक्त दबाब सिर्जना गर्न उनले आह्वान गरे । जबरजस्ति सो घटनालाई राजावादीको हिंसात्मक प्रदर्शन भनेर भाष्य निर्माण गर्न खोजिएको उनको भनाइ थियो ।