​गृहमन्त्रीबाट प्रहरी प्रमुखमाथि वक्रदृष्टि राख्ने र चेन अफ कमान्ड तोड्न खोजियो: कांग्रेस

काठमाडौं। प्रमुख प्रतिपक्षी दल नेपाली कांग्रेसले गृहमन्त्रीबाट प्रहरी प्रमुखमाथि वक्रदृष्टि राख्ने सुरक्षा कमान्डमा ‘चेन अफ कमान्ड’ तोड्ने काम भएको आरोप लगाएको छ । सीडीओ र प्रहरीमा सरुवा आतंक मच्चाइएको कांग्रेसको आरोप छ ।

विनियोजन विधेयक अन्तर्गत गृहमन्त्रालयको बजेटमाथि मंगलवार प्रतिनिधि सभामा भएको छलफलमा कांग्रेस सांसद अर्जुननरसिंह केसीले नियमावलीविपरीत प्रहरीमा सरुवा आतंक भइरहेको बताएका हुन् ।

‘सरकारले सय दिन कटाइसकेको छ । सय दिनको अवधिमा १७ पटक प्रहरीको सरुवा भएको छ । ३४ सय प्रहरी र ६६ जना सीडीओ परिवर्तन भए,’ केसीले भने, ‘प्रहरी नियमावलीमा एक वर्षसम्म विशेष परिस्थिति र कामका खोट देखिएमात्र सरुवा गर्ने प्रावधान छ । प्रहरीभित्र चेन अफ कमान्ड र प्रशासनलाई लाचार छाया बनाउने काम गरिएको छ ।

कांग्रेस नेता केसीले गृहमन्त्रीले प्रहरी प्रमुखमाथि वक्रदृष्टि राखेको आरोप लगाए । ‘सुरक्षा कमान्डमा चेनअफ कमान्ड ब्रेक गर्ने र प्रमुख माथि वक्रदृष्टि राख्ने कुराले प्रशासन चल्दैन’ उनले भने । गृहमन्त्री रवि लामिछानेले प्रहरी प्रमुख वसन्त कुँवरलाई हटाउन चलखेल गरिरहेको समाचार प्रकाशमा आएको थियो ।

सोही कुरातर्फ संकेत गर्दै केसीले प्रहरी महानिरीक्षकमाथि वक्रदृष्टि लगाइएको बताएका हुन् ।