बजेट अभावमा बागलुङमा खानेपानी आयोजना अलपत्र

बागलुङ । बडिगाड गाउँपालिका–३ मा चरम खानेपानी अभाव भएपछि आर्थिक वर्ष ०६७/६८ मा जिल्ला खानेपानी कार्यालयबाट ओखरगैँडा खानेपानी आयोजना परेको थियो । २ करोड ८५ लाख २९ हजार रुपैयाँमा सक्ने गरी काम सुरु भएको उक्त आयोजना १२ वर्षसम्म अपुरो छ ।

हालसम्म ६४ प्रतिशत मात्रै काम भएको खानेपानी तथा सरसफाइ डिभिजन कार्यालय बागलुङले जनाएको छ । आयोजनाको लागत ठूलो हुने तर बजेट कम पर्दा समयमै सम्पन्न हुन नसकेको कार्यालयका प्रमुख किरण पौडेलले बताउँछन् ।

ढोरपाटन नगरपालिका–२ र ३ मा आर्थिक वर्ष ०७४/७५ मा पम्पिङ खानेपानी आयोजना परेको थियो । आयोजना परे पनि लामो समय बजेट नपर्दा हालसम्म २५ प्रतिशत मात्रै काम भएको छ । चालु आर्थिक वर्षमा सरकारले १५ लाख रुपैयाँ विनियोजन गरेको थियो ।

जबकी उक्त आयोजनाको कूल लागत ५ करोड ३४ लाख ५२ हजार तोकिएको छ । खानेपानी डिभिजन कार्यालयका प्रमुख पौडेलका अनुसार आयोजना पूरा हुन अझै ३ करोड रुपैयाँ आवश्यक पर्छ । हालसम्म यो आयोजानामा ८५ लाख ७९ हजार रुपैयाँ खर्च भएको उनको भनाइ छ ।

यसरी नै बागलुङमा आवश्यक बजेट अभावमा वर्षौंअगाडि सुरु भएका आयोजना अलपत्र पर्न थालेका छन् । बागलुङमा ५ ठूला खानेपानी आयोजना बजेट अभावमा अलपत्र पर्ने अवस्थामा पुगेका हुन् । २ वर्षमा सकिनुपर्ने कतिपय आयोजना बजेट विनियोजनमा हेलचक्र्याइँ गर्दा वर्षौंसम्म पूरा हुन सकेका छैनन् ।

जिल्ला सदरमुकाम बागलुङ बजार नजिकै रहेको उपल्लाचौरमा आर्थिक वर्ष ०७५/७६ मा लामिचौर रमेटार खानेपानी आयोजना सञ्चालन भएको थियो । ३ करोड १४ लाख रुपैयाँ लागतमा निर्माण थालिएको उक्त आयोजनाको हालसम्म ४५ प्रतिशतमात्रै काम सकिएको छ ।

चालु आर्थिक वर्षमा उक्त आयोजनाका लागि प्रदेश सरकारबाट १५ लाख बजेट विनियोजन भएको थियो । डिभिजन प्रमुख पौडेलका अनुसार आयोजना सम्पन्न गर्न अझै ३ करोड ५५ लाख छ हजार आवश्यक पर्दछ । यस्तै आर्थिक वर्ष ०७६/७७ मा बडिगाड गाउँपालिकामा सुरु भएको भीरकटेरा खानेपानी आयोजना अहिलेसम्म ५० प्रतिशतमात्रै सकिएको छ ।

‘आयोजना निकै ठूला–ठूला छन् तर बजेट थोरै आउँदा समयमै काम सम्पन्न गर्न समस्या भएको छ । करोडौँका आयोजना छन्, बजेट रु १०/१५ लाख मात्रै आउँछ, यसरी हेर्दा एउटा आयोजना सकिन वर्षौं लाग्ने देखिन्छ’, प्रमुख पौडेलले भने, ‘बजेट अभावका कारण चाहेर पनि समयमै काम सम्पन्न गर्न सकिरहेका छैनौँ । आएको जति बजेटले धमाधम काम गरिरहेका छौँ ।’

ढोरपाटन नगरपालिका–२ का विकास सुनारले आयोजना सुरु भएको ७ वर्षसम्म जम्मा २५ प्रतिशत काम हुनु दुखद भएको बताए । हिउँदको समयमा बुर्तिबाङसहित आसपासका ठाउँहरुमा खानेपानीको चरम अभाव हुने भन्दै यसतर्फ सरोकार भएकाको ध्यान नजाँदा आयोजनाको कामले गति लिन नसकेको उनको गुनासो छ ।

यहाँका हजारौँ नागरिक वर्षौंदेखि खानेपानीका लागि लाइन कुर्नुपर्ने बाध्यतामा रहेका भन्दै ती आयोजना सरकारको प्राथमिकतामा पर्न नसकेको सुनारले बताए ।

‘कतै करोडौँका योजना पर्छन्, करोडौँ बजेट पनि पुग्छ, तर यहाँका हजारौँ जनता खानेपानीको समस्याबाट ग्रसित छन्, आयोजना सुरु पनि भएको वर्षौं बितिसक्दा पनि बजेट अभावले काम सम्पन्न भएका छैनन्’, उनले भने, ‘करोडौँका आयोजनामा जम्मा १५ लाख रुपैयाँ आउँछ, यसरी २०औँ वर्षसम्म पनि काम सकिँदैन, जनता सधैँ खानेपानीको समस्यामा हुन्छन् ।’