काँग्रेसले सरकारको नेतृत्व लिन ढिला गर्न हुँदैन : शेखर कोइराला

काठमाडौँ । नेपाली काँग्रेसका नेता डा. शेखर कोइरालाले प्रधानमन्त्री पुष्पकमल दाहाल ‘प्रचण्ड’को रिपोर्ट कार्ड मागेका छन् । काँग्रेसको नुवाकोट जिल्ला सम्मेलनलाई सम्बोधन गर्दै काँग्रेसले सरकारको नेतृत्व लिन ढिला गर्न नहुने बताए ।

उनले भने, ‘सरकारको कामकारबाहीको कुरा आइराखेको छ । मैले सुनेको अर्थमन्त्रीजी यही हुनुहुन्छ । पुस ५ देखि १० गतेसम्म प्रधानमन्त्रीले काठमाडौँ नछाड्नु भनेको मैले सुनेको छु । रिपोर्ट कार्ड हेर्ने होला । म त प्रधानमन्त्रीको रिपोर्ट कार्ड मागिरहेको छु । देशको प्रधानमन्त्रीले कस्तो काम गर्नुभयो भन्ने कुरा हुन्छ । अनि प्रधानमन्त्रीले रिपोर्ट कार्ड लिने ? हामीले प्रधानमन्त्रीको रिपोर्ट कार्ड लिने हो । प्रधानमन्त्रीज्यू तपाईँको रिपोर्ट कार्ड हामीलाई चाहिएको छ ।’

संसदीय व्यवस्थामा मन्त्रीहरूले राम्रो नराम्रो काम जस्तो गरे पनि त्यसको सबै जस–अपजस प्रधानमन्त्रीले लिनुपर्ने उनको भनाइ छ । उनले अहिले गणतन्त्रमाथि देशभर आक्रमण भएको पाइएको बताए । जनताको निराशा र आक्रोश गणतन्त्र, सङ्घीयताप्रति नभई नेतृत्वप्रति भएको उनको बुझाइ छ।

यस्तै काँग्रेस सबैभन्दा ठूलो पार्टी भए पनि कसैको बैसाखी टेकेर आए जस्तो आभाष भएको नेता कोइरालाले बताए । उनले एकले अर्काको खुट्टा तान्ने नभई एकताबद्ध भएर पार्टीलाई अगाडि बढाउनुपर्ने उनको भनाइ छ।

उनले भने, तपाईँहरू काँग्रेस सकियो भन्नुहुन्छ । हामीहरूले हाम्रो सङ्गठनलाई चुस्त बनाएर लगौँ भने कसैले हराउन सक्दैन । हामीलाई हाम्रो साथीहरूसँग मात्रै डर लाग्छ । हामीले सङ्गठन र विकासलाई सँगै लानुपर्छ ।’