पुरुष मात्र नभई महिला पनि उत्तिकै सबल र सक्षम छन् भन्ने नमुना भरतपुर मेयरका प्रत्यासी रेनु दाहाल : महिला मतदाता

चितवन । भरतपुर महानगरको स्थानिय तहको निर्वाचनले यतिबेला देशैभरि सबैको ध्यान तान्न सफल भएको छ । चर्चा चुलिएसंगै भरतपुर महानगरको चुनावी गतिविधी रोचक बन्दै गएको छ । दुई धु्रवमा बाँडिएर चुनावी गतिविधीमा संलग्न भएका दलहरु यतिबेला प्रचारप्रसार र घरदैलोलाई तिब्रता दिएका छन् ।

देशभरि नै पकड बनाउन सफल भएको सत्तारुढ ५ दलिय गठबन्धनले आफुहरु प्रतिगामी विरोधी शक्ती भएकाले चितवनका मतदाताहरुलाई आफ्नो पक्षका उम्मेदवारलाई मतदान गर्न आग्रह गरिरहेका छन् । उता राप्रपासंग गठबन्धन गरेको एमालेले पनि प्रचारप्रसारलाई तिब्रता दिदै घरदैलो अभियानलाई निरन्तरता दिईरहेको छ ।

प्रचारप्रसारको दिन कम हुँदै गर्दा पालिका प्रमुख देखि वडा सदस्य सम्मका उम्मेदवारहरु यतिबेला आफ्नो गांउठांउको विकास र समृद्धिका खाकाहरु प्रस्तुत गर्दै मतदाता रिझाउन व्यस्त छन् । त्यसमा पनि भरतपुर महानगरको प्रमुख पदमा निर्वतमान मेयर रेनु दाहालले उम्मेदवारी परेपछि देशवासीको ध्यान नै अहिले भरतपुर तर्फ सोझिएको छ ।

५ वर्ष अघि दाहालले चुनाव जित्दै गर्दा अधिकांश नगरबासीले यत्रो नगरले महिला मेयर पाएको छ, के विकास हुने होला र खै, भन्दै गर्दा त्यही मतदाताहरु ५ वर्ष पछि अहिले नगरको विकास देखेर दंग छन् । अवसर पायो भने पुरुष मात्र नभई महिला पनि उत्तिकै सबल र सक्षम छन् भन्ने नुमना दाहालले प्रस्तुत गरेकी छिन् ।

दाहालको नेतृत्वमा गएको ५ वर्षमा स्थानिय स्तरमा यति धेरै विकास भएको छ कि, केही स्थानका स्थानियबासी पनि चकित भएका छन्, पुर्वाधार निर्माण देखेर । ‘घर अगाडीको यो सडक वर्षामा हिलाम्य र अन्य बेला धुलाम्य मात्र हुन्थ्यो, कच्ची सडक ग्राभेल पनि के हुन्थ्यो र भनेर सोचेकी थिए, पश्चिम चितवनका पार्वती विकले भनिन्,‘तर सोचेभन्दा फरक भयो, अहिले त कालोपत्रे नै भएको छ, आश्चर्यचकित छु ।’

जिल्लाको एकमात्र पहाडी गाविस भरतपुर २९ कविलास आसवीर तामांगको प्रतिक्रिया पनि उस्तै छ, उनले भने,‘यो पहाडी गाविसमा खानेपानी र स्वास्थ्य चौकीको धेरै समस्या थियो, तर अहिले ३ वर्ष यता धेरै हदसम्म सुविधा पाएका छौं ।’ विगतमा स्थानिय जनप्रतिनिधले गर्न नसकेको विकास महानगर भईसकेपछि मेयर रेनु दाहालको अगुवाईमा भएको छ, महिला भएर के भयो, विकास गर्ने भिजन र उच्च मनोबल हुनुपर्छ, त्यो उहाँमा मैले पाए ।’

वितेको पाँच वर्षको कार्यकालमा निवर्तमान महानगर प्रमुख रेनु दाहाल र उनको टीमले गरेको मेहनतका कारण यो महानगर चर्चा जिल्लामा मात्र नभई राष्ट्रिय स्तरमै चुलिएका ेछ । वितेको पाँच वर्षमा ६२२ किलोमिटर कालोपत्रे गरिएको छ । ४५० किलोमिटर सडक स्तरीय ग्राभल गरिएको छ ।

नेपालकै सबभन्दा लामो ८८.६ कि।मि। महानगरीय रिङ्गरोड आठ अर्व २० करोडको लागत रहने गरी प्रारम्भिक वातावरणीय परीक्षणसहित विस्तृत परियोजना प्रतिवेदन तयार भइ सकेको र ४०.५५ किलोमिटर चक्रपथ निर्माण भइ सक्ने अवस्थामा छ । त्यस्तै गोन्द्राङ पुल्चोक ६ लेन सडक, नारायणी नदिको तटबन्धन, अन्तर्राष्ट्रिय रंगशाला, यि त भए ठुलो पूर्वाधारका कार्यक्रम,स्वास्थ्य, शिक्षा, कृषिलाई लक्षित गरि उनले ल्याएको साना योजनाले मूर्तरुप पाउदा स्थानिय समेत खुसी छन् ।

महानगरको मेयर पदमा उनले पुनः उम्मेदवारी दिएपछि महिला मतदाता उनको पक्षमा मतदान गर्न झनै हौंसिएका छन् । स्थानिय महिलाहरुको भनाई छ, उनको बुवा प्रचण्ड एउटा राष्ट्रिय पार्टीको प्रमुख छ, उनको अग्रसरमा भरतपुरमा धेरै बजेट आए होलान, तर स्थानिय स्तरको विकासको खाका त उनका बुवा प्रचण्डले कोरेनन्, रेनुले आफ्नै क्षमताले गरिन्, समग्र नगरको विकासमा उनको ठुलो योगदान छ, त्यसैले अहिले बाँकी भएका अधुरा विकास योजनाहरु पुरा गर्न पनि एक कार्यकाल उनलाई जिताउनै पर्छ।