नेकपा बैठकमा यी हुन् माधव नेपालले राखेका १५ बुँदे असहमतिका मत

काठमाडौं । सत्तारुढ दल नेकपाको सचिवालय बैठकमा बिहिबार तिन वटा विषयले प्रवेश पाए । पहिलो थियो, कोभिड संक्रमणमा देखिएको बढोत्तरी र सरकारको नियन्त्रण प्रयास । दोश्रो थियो, उपाध्यक्ष वामदेव गौतमलाई राष्ट्रिय सभा मनोनयनका लागि लैजाने ६ महिना अगाडीको निर्णय कार्यान्वयन र तेश्रो थियो, पार्टी समस्या समाधान सुझाव कार्यादलले बुझाएको प्रतिवेदनमाथीको छलफल ।

कोभिडका बारेमा प्रधानमन्त्रीले सरकारले नियन्त्रण प्रयासका लागि गरिरहेको प्रयासका बारेमा लामैं ब्रिफिङ गरे । सँगै देशभर बाढी पहिरोले पारिरहेको धनजनको क्षति र त्यसमा पनि सरकारी प्रयास प्रधानमन्त्रीको ब्रिफिङ थियो, पार्टी बैठकमा । त्यसपछि पार्टीले निर्देशन दियो, सरकारलाई अझ प्रभावकारी रुपमा यी दुवै प्रकोप नियन्त्रणका लागि काम गर्नु । 

दोश्रो विषय उपाध्यक्ष वामदेव गौतम राष्ट्रिय सभा लैजाने गत फागुन १४ को सर्वसम्मत पार्टी निर्णयमा प्रधानमन्त्रीले नै सरकारले कार्यान्वयनको तयारी गरेको र त्यसैको क्रममा रहेको जानकारी बैठकलाई आफैंले गराए । अध्यक्ष पुष्पकमल दाहाल प्रचण्ड लगायत नेताहरुले पार्टीको संस्थागत निर्णय कार्यान्वयन हुन लागेको भन्दै सुखी ब्यक्त गरे । निर्णय कार्यान्वयनका लागि प्रधानमन्त्रीलाई सबै नेताहरुले धन्यवाद दिए । 

त्यसपछि प्रवेश गर्यो, नेकपा बैठक पार्टीभित्रको समस्या समाधान सुझाव कार्यदलको प्रतिवेदनमाथीको छलफल । दुवै अध्यक्षले पार्टी सचिवालयका नेताहरुको र मुख्यतः दुई अध्यक्षको छलफलको स्पिरिटमा रहेर कार्यदलले निर्धारित समयमा महत्वपूर्ण सुझाव सहितको प्रतिवेदन बुझाएकोमा कार्यदलमा रहेर काम गरेका महासचिव विष्णु पौडेल लगायतका सदस्यहरुलाई धन्यवाद दिए ।  कार्यदलले ओलीले सरकार र प्रचण्डले पार्टी चलाउने गत मंसिर ४ को सहमतिको थप स्पष्ट ब्याख्या गर्दै सरकार पूर्नगठन, राजनीतिक नियुक्तिहरु सचिवालयमा छलफल पछि मात्र निर्णय गर्ने लगायतका समस्याहरुको सम्बोधन गर्ने गरी आएको थियो ।

तर निरन्तर एक ब्यक्ति एक मुख्य जिम्मेवारीको आवाज उठाउदै आएका वरिष्ठ नेताको त्यही माग सम्बोधन प्रतिवेदनमा थिएन् । गत ५ भदौबाट होम क्वारेन्टाइनमा बसेका र दुई दिन यता मात्रै राजनीतिक भेटघाट थालेका बरिष्ठ नेता नेपालले बैठकमा के राख्लान् ? चासो सबैको नेपाल तिर थिए ।  कार्यदलको प्रतिवेदन समस्या पन्छाउने साधन नबनोस्, पार्टी र सरकारमा देखिएका समस्या समाधान गर्दै जनताको विश्वास पूनः आर्जन गर्ने प्रस्थान विन्दु बनोस भन्ने अपेक्षाका बीचमा कार्यदल प्रतिवेदन आउनुपर्नेमा अपूर्त र अस्पष्ट मात्र रहेको भन्दै उनले प्रतिवेदन सच्चाउन जरुरी रहेको भन्दै आफुले मोबाइलमा टिपोट गरेर ल्याएको १५ बुँदे असहमतिका बारेमा बैठकमा बुँदागत ब्रिफिङ गरे । 

सचिवालयका एक सदस्यका अनुसार नेपालले पार्टी सचिवालय बैठकमा कार्यदलको प्रतिवेदनमा राखेका असहमतिका १५ बुँदा यस्ता थिए :
 
–         कार्यदलको प्रतिवेदन अमूर्त र अस्पष्ट छ । यसलाई सच्चाउन जरुरी छ ।

–         अध्यक्ष पुष्पकमल दाहाल (प्रचण्ड) को कार्यविभाजनमा मूलत कार्यकारी अधिकार भनिएको छ । त्यो नै अमूर्त छ । मूलत भन्नाले कस्तो हो ? त्यसको ब्याख्या पुगेन् । 

–         एक ब्यक्ति एक मुख्य पदको जिम्मेवारी विधानको धारा ४६ (क) मा रहेपनि त्यस विषयमा प्रतिवेदनमा किटानीका साथ कुनै विषय समेटेर आएन् । त्यसमा किन प्रतिवेदन मौन बस्यो ? के त्यो पार्टीभित्रको समस्या होइन ?

–         दुई अध्यक्ष र महासचिवले कुनै पनि प्रस्ताव पार्टी बैठकमा निर्णयका लागि प्रस्तुत गर्ने प्रतिवेदनमा भनिएको छ । यो भनेको के हो ? विधानको धारा ६० ले बहुमतको निर्णय पार्टी निर्णय हुने उल्लेख गरेको छ । अनि दुई अध्यक्ष र महासचिवको मात्र प्रस्ताव पार्टी निर्णय हुने गरी प्रतिवेदनमा ल्याइनु विधान विपरित ब्याख्या भएन र ? यो सच्चाउनुपर्छ । 

 –         पार्टीभित्र षडयन्त्र,  गुटबन्दी अन्त्य गर्ने कुरा प्रतिवेदनमा छ । पार्टीमा अहिलेसम्म त्यस्तो दाउपेच र षडयन्त्र कसले गरेको हो ? त्यो विषय पनि प्रतिवेदनमा उल्लेख गर्नुपर्छ । 

 –         पार्टीका सर्कुलर कसले जारी गर्ने ? प्रष्ट भएन् ।

 –         पार्टी र सरकारको काम प्रभावकारी बनाउने मात्र भनेर हुदैन् । अझ त्यसलाई परिष्कृत गरेर पारदर्शी र जनविश्वासी थप गरेर जानुपर्छ ।

 –         पार्टी एकता अक्षुण राख्ने भनेको के हो ? एकता भड्काउन कसले भूमिका खेल्यो ? यसको ब्याख्या प्रष्ट हुनुपर्छ ।

 –         पार्टी भित्रको समस्या समाधान नगर्ने, पन्छाउने, फरक मत राख्नेप्रति असहिष्णु ब्यवहार राख्नेहरुका सन्र्दभमा प्रतिवेदनमा किन केही आएन, यो विषय पनि प्रष्ट हुने गरि थप्नुपर्छ ।

 –         दुई अध्यक्षको समन्वयमा पार्टी सञ्चालनको कुरा गरेर कमिटिको महत्वलाई कमजोर बनाउने काम किन भयो ? कमिटिको कुनै भ्यालु पार्टीभित्र छैन ?