राष्ट्र बैंकको गर्‍यो तीन बैंकलाई कारबाही

काठमाडौँ  । राष्ट्र बैंकले चालु आर्थिक वर्षको दोस्रो त्रैमासमा तीन बैंकलाई कारबाही गरेको छ। राष्ट्र बैंकले प्रभु बैंक, हिमालय बैंक र एनआइसी एसिया बैंकलाई कारबाही गरेको हो।

सञ्चालकको पद रिक्त भए अर्को वार्षिक साधारण सभा नभसम्मको लागि सञ्चालकको नियुक्ति सञ्चालक समितिबाट गर्न सकिने व्यवस्था भए पनि प्रभु बैंकले यसरी नियुक्ति गरिएको सञ्चालकलाई नै साधारण सभाबाट अनुमोदन गराएर निरन्तरता दिइएको भन्दै सचेत गराएको हो।

सर्वसाधारण सञ्चालकको पदावधि सकिए पनि मर्जर तथा प्राप्तिको व्यवस्थालाई आफू अनुकूल व्याख्या गरेर बैंकले प्राप्ति (एक्विजिसन) को मितिबाट सञ्चालकको पदावधि गणना गरेको पाइएको हो। राष्ट्र बैंकले ती सञ्चालकलाई हटाउन भनिसकेको छ।

पुँजी कोष पर्याप्तता अनुपात गणनाको क्रममा प्राथमिक पुँजीबाट घटाउनु पर्ने रकम नघटाएको, केही कर्जाहरूमा कम जोखिमभार देखाएको भन्दै राष्ट्र बैंकले प्रभु बैंकका प्रमुख कार्यकारी अधिकृतलाई सचेत गराएको हो।

एनआइसी एसिया बैंकले आफ्ना सञ्चालक र तिनका परिवारका सदस्य, सम्बद्ध संस्थाहरूलाई प्रकाशित ब्याजदरभन्दा बढी ब्याज दिएको, पुरानो मिति राखेर समेत यस्तो खातामा ब्याज दिइएको पाइएको हो।

राष्ट्र बैंकले यसरी बढी दिएको ब्याज बैंकले फिर्ता पाउने व्यवस्था गरेको थियो।

त्यस्तै, स्थलगत निरीक्षणको क्रममा बैंकले कर्जा वर्गीकरण तथा कर्जा नोक्सानीसम्बन्धी निर्देशन, पुँजीकोष तथा जोखिमभार सम्बन्धी निर्देशन, ब्याजदरसम्बन्धी निर्देशन एवम् संस्थागत सुशासनसम्बन्धी कतिपय निर्देशनको पालना नगरेको समेत पाइएको राष्ट्र बैंकले उल्लेख गरेको छ।