भीम रावललाई प्रधानमन्त्री ओलीले किन बोलाए बालुवाटार ?

काठमाडौं । नेकपा स्थायी समिति सदस्य भीम रावल सत्तारुढ दल नेकपाभित्र सरकारको आलोचकका रुपमा प्रतिपक्षकै नेता जस्ता छन् । आफ्नै पार्टीको सरकार र सरकारको नेतृत्वको आलोचनामा उनी सधै प्रमुख प्रतिपक्ष भन्दा पनि अगाडी देखिन्छन् । कतिपय काँग्रेस नेताहरु नै हामीले निर्वाह गर्नुपर्ने धर्म सत्तारुढ दलमा रहेर भीम रावलले नै निर्वाह गरिरहेको समेत टिप्पणी उनको प्रस्तुतीलाई लिएर गर्ने गरेका छन् । 

तिनै रावल अहिले सत्तारुढ दलका दुई अध्यक्ष प्रधानमन्त्री केपी ओली र प्रचण्डले पार्टीभित्रको विवाद सल्टाउन गठन गरेको ६ सदस्यीय कार्यदलको सदस्य छन् । महासचिव विष्णु पौडेलको नेतृत्वमा गठन भएको कार्यदलमा उनी सदस्य छन् । कार्यदलको बैठक हिजो बिहान साढे ८ बजेदेखि नै पौडेलको भैंसेपाटी निवास छेउमै रहेको एक ब्यापारीको घरमा बसिरहेको थियो । तर रावल ११ बजेसम्म पनि बैठकमा सहभागी थिएनन् । 

वरिष्ठ नेता माधव नेपाल समुहका नेता रावल बैठकमा किन उपस्थित भएनन् ? केहीबेर उनलाई सोधीखोजी गरियो । कतै माधव नेपाल, झलनाथ खनाल र नारायणकाजी श्रेष्ठले कार्यदल पार्टी कमिटिको बैठकबाट अनुमोदन गराउनु पर्ने आवाज उठाईरहेकोले नेपालहरुको माग अनुसार नै पार्टीले अनुमोदन नगर्दा सम्म कतै बैठकमा नआउने पो हुन् की ? कार्यदलका अन्य ५ नेताहरुका बीचमा छलफल चल्यो । उनको मोबाइल पनि स्वीच अफ थियो । 

तर जब उनी हस्याङफस्याङ गर्दै साढे ११ बजे मात्र भैंसेपाटी स्थित कार्यदलको बैठक स्थल पुगे, त्यसपछि मात्र थाहा लाग्यो, उनी प्रधानमन्त्री ओलीसँग भेटका लागि बालुवाटार पुगेका रहेछन् । आफ्नै पार्टीको सरकारको कमजोरीमा निक्कै खरो आलोचक बनेका उनलाई प्रधानमन्त्री ओली स्यवंले समय दिएर भेट्न बोलाएपछि रावल बालुवाटार पुगेका रहेछन् । उनले हिजो आइतबार बिहान प्रधानमन्त्री ओलीसँग ९ देखि साढे १० बजेसम्म करिव डेढ घण्टा छलफल गरेर कार्यदल बैठकमा पुगेका थिए । 

ओली स्यवंले कार्यदल बैठक चलिरहेका बेला रावललाई बालुवाटार किन बोलाए ? कार्यदलको बैठकमा पुगेका उनले समसामायिक विषयमा छलफलका लागि प्रधानमन्त्रीले आफुलाई बालुवाटार बोलाएको समान्य जानकारी दिने बाहेक थप कुराकानी खुलाएनन् ।  पार्टी स्थायी समिति बैठक शुरु भएकै दिन गत असार १० मा उनले पार्टी बैठकको एजेण्डा बनाउने बेला पनि सरकार र पार्टीका सम्बन्धवारे थप चर्चा गरिरहदा ओलीले रावललाई यस विषयमा आफुले छुट्टै छलफल गर्ने बताएका थिए । त्यसका लागि आफुले समय नै दिएर बोलाउने प्रधानमन्त्री ओलीको भनाई थियो । 

त्यसपछि दुई साता अगाडी मात्रै प्रधानमन्त्रीले रावललाई भेटघाटका लागि बालुवाटार बोलाएका थिए । त्यसबेला भने झण्डै दुई घण्टा ओली र रावलका बीचमा भेटवार्ता भएको थियो । त्यसपछि उनको वान टु वान छलफल हिजो आइतबार भएको हो ।  दई साता अगाडीको छलफलमा प्रधानमन्त्री ओलीले ०३६ सालको विद्यार्थी आन्दोलन देखिको घटनाक्रममा रावलको भूमिका अत्यन्त महत्वपूर्ण रहेको भन्दै पार्टीभित्रको विवाद चर्काउने भन्दा सल्टाउने गरी जानु पर्ने भन्दै छलफल गरेका थिए ।

लामो पृष्ठभूमि बाँधेर रावलको पार्टीभित्रको योगदानको चर्चा गरेका ओलीले त्यसबेला आफ्ना चिकित्सकहरु स्वास्थ्य फलोअपका लागि बालुवाटार आईसकेको र अर्काे दिन फेरि बोलाएर छलफल गर्ने भन्दै त्यसबेला बिदाई गरेका थिए । रावलले प्रधानमन्त्रीको मात्र कुरा सुनेर फर्केका थिए, त्यसबेला । अर्काे दिन फेरि अब तपाईको कुरा सुन्न म बालुवाटार बोलाउछु भन्दै प्रधानमन्त्रीले उनलाई बिदाई गरेका थिए । अहिले कार्यदल बनेपछि कार्यदलमा हुने छलफलमा रावलको प्रस्तुती मत्थर बनाउन प्रधानमन्त्रीले उनलाई यही बेला बोलाएर छलफल गरेको हुन सक्ने बताईएको छ । 

रावल र प्रधानमन्त्री बीच हिजोको भेटमा के कुरा भए ? दुवै पक्षवाट खास नबताइएपनि कार्यदलमा रावलको प्रस्तुती मथ्थर बनाउन उनलाई प्रधानमन्त्रीले भेट्न बालुवाटार बोलाईएको हुन सक्ने अड्कलबाजी लगाउन थालिएको छ । कार्यदलमा स्थायी समिति बैठकमा पेश भएका एजेण्डाहरुमा सहमतिको प्रस्ताव के बनाउने ? पार्टीका १५२ नेताहरुले माग गरेको केन्द्रीय समिति बैठक के गर्ने र महाधिवशेन सम्मको कार्यतालिका सहितका ठोस कार्यक्रम के बनाउने भन्नेमा केन्द्रीत रहेर छलफल गर्दैछ । 

यही कार्यदलले स्थायी समितिको एजेण्डामा रहेको अमेरिकी सहयोग नियोग मिलेनियम च्यालेन्ज कर्पाेरेसन (एमसीसी) बारे पनि पार्टीको ठोस निर्णय लिनुपर्ने अवस्था छ । कार्यदललाई यस विषयमा पनि के गर्दा उपयुक्त हुन्छ प्रस्ताव ल्याउन भनिएको छ । रावल एमसिसिको चर्काे आलोचकका रुपमा देखिएका छन् ।

त्यही कारण पनि प्रधानमन्त्रीले रावललाई कार्यदल बैठक चलिरहेकै बेला एक्लै बोलाएर छलफल गरेको हुन सक्ने अनुमान नेकपा नेताहरुले गरेका छन् । जे होस प्रधानमन्त्री आफैले रावललाई बोलाएर आइतबार गरेको ढेड घण्टा लामो छलफल अर्थपूर्ण देखिएको छ ।