काँग्रेसका मन्त्रीहरूले भने-ओली नेतृत्वको सरकारमा काम गर्न कहीँ न कहीँ समस्या छ

काठमाडौँ । नेकपा एमालेका अध्यक्ष केपी शर्मा ओली नेतृत्वको वर्तमान सरकारमा सहभागी काँग्रेसका मन्त्रीहरूले काम गर्न प्रत्यक्ष असहयोग नभए पनि समस्या भने रहेको बताएका छन् ।

नेपाली काँग्रेसका शीर्ष नेता र मन्त्रीहरू बीच बिहीबार भएको छलफलमा मन्त्रीहरूले ब्रिफिङ गर्ने क्रममा काम गर्ने क्रममा आइपरेका समस्या र अप्ठ्याराबारे जानकारी गराएका हुन् ।

सभापति शेरबहादुर देउवा निवास बुढानीलकण्ठमा संसदीय कार्यसमितिमा छलफलका लागि १० मन्त्री र २ राज्यमन्त्रीलाई डाकिएको थियो । उक्त बैठकमा प्रधानमन्त्री ओलीसँग काम गर्दा प्रत्यक्ष अप्ठ्यारो नभए पनि कहीँ न कहीँ समस्या रहेको मन्त्रीहरूले बताएको युवा तथा खेलकुद मन्त्री तेजुलाल चौधरीले बताए ।

‘तर, कति कुराहरू सोचे अनुसार फास्ट हुनुपर्ने, त्यो कुराहरू कुनै न कुराबाट कहीँ न कहीँबाट अप्ठ्यारा महसुस हाम्रा साथीहरूले गर्नुभएको छ,’ पार्टीसँग छलफल पछि चौधरीले भने, ‘हाम्रा नेताहरू मिलेर समस्या समाधान गर्ने उपायहरू बताइरहनु भएको छ ।’

६ महिनाको अवधिमा आफूले गरेका कार्यको विस्तृत जानकारी मन्त्रीहरूसँग लिने र आवश्यक सुझाव दिने गरी पार्टीले छलफल डाकेको थियो । प्रत्येक मन्त्रीले आफूले गरेका सुधार, उपलब्धि र अप्ठ्यारा बारे पार्टीलाई जानकारी गराएका छन् ।

यसैगरी कृषि तथा पशुपन्छी मन्त्री रामनाथ अधिकारीले किसानलाई आवश्यक पर्ने रासायनिक मल आयात गर्न ६० अर्ब रुपैयाँ आवश्यक भए पनि २७ अर्ब ९५ करोड बजेट मात्र विनियोजन भएको बताए । एमाले उपाध्यक्ष विष्णु पौडेल अर्थमन्त्री छन् ।

अधिकारीले रासायनिक मल आयात गर्न रकमको अभाव हुने बताएका थिए । ‘साढे पाँच लाख मेट्रिक टन आयात गर्न सकिने अवस्था छ । किसानको माग ११ लाख मेट्रिक टन छ,’ मन्त्री अधिकारीले भने,‘सरकारले रकम विनियोजन गर्दा २७ अर्ब ९५ करोड मात्रै छुट्याएको छ । किसानले चाहेजति रासायनिक मल उपलब्ध गराउन लगभग ६० अर्ब रुपैयाँ चाहिन्छ ।’

युवा तथा खेलकुद मन्त्री चौधरीका अनुसार बैठकमा महामन्त्री गगन थापाले जारी भएका अध्यादेश बारे पार्टीमा जानकारी गराएका थिए । ‘यस विषयमा हामीमा सकारात्मक छलफल भएकै कुरा भयो । यसमा त्यति चर्चा र परिचर्चा गर्ने कुरा भएन,’ चौधरीले भने ।

राष्ट्रपति पौडेलले सरकारबाट सिफारिस भएका पाँच अध्यादेश जारी गरेका छन् ।