प्रचण्ड–ओलीबीच बालुवाटारमा फेरि वार्ता

काठमाडौँ । प्रधानमन्त्री एवम् नेकपा अध्यक्ष केपी ओली र अर्का अध्यक्ष पुष्पकमल दाहाल ‘प्रचण्ड’बीच फेरि बालुवाटारमा भेटवार्ता  भएको छ। पटकपटक भएको वार्तामा दुई अध्यक्षबीच हालसम्म कुनै सहमति भएको छैन । 

पार्टीभित्र देखिएको विवादबारे छलफल गर्न प्रचण्ड समय लिएर प्रधानमन्त्रीलाई भेट्न बालुवाटार पुगेका थिए । यतिबेला दुई अध्यक्षबीच भेटवार्ता भइरहेको स्रोतले जनाएको छ । शनिबार दुई अध्यक्षबीचमा मंसिरमा अर्ली महाधिवेशन गर्ने सहमति भएको भनेर प्रचार गरिएको थियो । 

अध्यक्ष प्रचण्डले प्रधानमन्त्री केपी शर्मा ओलीले आगामी मंसिरमा महाधिवेशन गर्ने प्रस्ताव गरेपनि त्यसमा आफ्नो कुनै समर्थन नरहेको स्पष्ट पारेका छन् ।

आइतबार प्रचण्ड निवास खुमलटारमा सचिवालयका ४ सदस्य र केही स्थायी समितिका सदस्यको भेलामा बोल्दै अध्यक्ष प्रचण्डले अर्का अध्यक्ष ओलीले गरेको ‘अर्ली महाधिवेशन’ प्रस्ताव मान्य नरहेको र त्यसमा आफूहरुबीच कुनै सहमति नभएको प्रष्ट पारेका हुन् ।

‘अर्ली महाधिवेशन’ प्रस्तावप्रति माधवकुमार नेपाल, झलनाथ खनाल, नारायणकाजी श्रेष्ठलगायतका नेताहरुले समेत असहमति जनाएका छन् ।