प्रचण्ड निवासमा इश्वर पोखरेलको बाक्लो इन्ट्री !

काठमाडौं । कुनै बेला नेकपा अध्यक्ष प्रचण्डका कटु आलोचक थिए,– उपप्रधान तथा रक्षामन्त्री इश्वर पोखरेल । पार्टी एकता भएपछि पनि उनले पूर्व माओवादी धार र त्यसको नेतृत्व गरेका प्रचण्डमाथीको आलोचना छोडेका थिएनन् । नेपालका दुई कम्युनिष्ट पार्टी एकतापछि पनि पोखरेलले यो एकतालाई खास त्यक्ति रुचाईरहेका थिएनन् । त्यसको कारण थियो,–उनले तत्कालिन एमालेको आउने महाधिवशेनमा सिधै अध्यक्षमा गर्न लागेको प्रतिस्पर्धा । तर उनलाई धक्का लाग्यो ।

तत्कालिन एमालेको पार्टी महासचिव रहेका उनलाई यो एकताले ब्यक्तिगत रुपमा पदीय आकांक्षामा घाटा पु¥याएपनि नेपालको कम्युनिष्ट आन्दोलनलाई भने फाइदा पुगेको थियो । तर पोखरेलले देशको, पार्टीको हितलाई भन्दा आफनो ब्यक्तिगत पद प्रतिष्ठा मात्र सोचे । एकतापछि उनको महासचिव पद गुम्यो, विष्णु पौडेलले बाजी मारिदिए । त्यसपछि उनी एकताको बारेमा नबोलेपनि अध्यक्ष प्रचण्ड र पूर्व माओवादी खेमा विरुद्ध भने बोल्दै हिडेका थिए ।

एकतापछिको पार्टीको राजनीतिक कार्यदिशा समाजवाद उन्मुख जनताको जनवादको कार्यदिशामै पनि उनले प्रश्न उठाए । एकताका क्रममा तत्कालिन एमालेको जनताको बहुदलीय जनवाद (जवज) र माओवादीको एक्काइशौं शताब्दीको जनवाद को कार्यदिशा स्थगन गरिएको थियो । तर पोखरेलले सार्वजनिक मञ्चमै पार्टी एकता पछिको कार्यदिशमा असन्तुष्टि जनाउँदै आए ।

जवजकै पक्षमा निरन्तर वकालत गदै आईरहेका थिए । उनको त्यही कार्यशैलीका कारण स्कुल विभागमा तत्कालिन माओवादी पक्षका नेताहरुले उनलाई त्यक्ति रुचाएका थिएनन् । तर बैगुनीलाई पनि गुनले पाठ सिकाउनु पर्छ भन्ने जानेका अध्यक्ष प्रचण्डले तत्कालिन पूर्व माओवादीका नेताहरुको अरुचीका बीच पनि स्कुल विभाग प्रमुख पोखरेललाई दिन सहमति जनाए । त्यक्ति मात्र होइन, अध्यक्ष प्रचण्डले उनकै निवासमा पुगेर पनि पोखरेलसँग राजनीतिक छलफल गरे ।

ओली खेमामै खास रुचीकर नेताको कोटीमा नपर्ने पोखरेल अहिले आफनो राजनीतिको जोडघटाउमा छन् । त्यही भएर पनि उनी प्रचण्डसँग हिमचिमको खोजीमा छन् । उनी अहिले प्रचण्ड निवास पनि धाउन थालेका छन् । सोमबार उनले प्रचण्ड निवास खुमलटारमा पुगेर झण्डै ढेड घण्टा छलफल गरे ।

तर यो छलफल भने अन्य विषयमा भन्दा पनि पार्टीको स्कुल विभागको पूर्णताका विषयमा केन्द्रीत रहेको पोखरेल निकट नेताहरुको भनाई छ । पार्टीको स्थायी समिति बैठकले आगामी केन्द्रीय समिति बैठक अगाडी एकता प्रक्रिया टुंग्याउन बाँकी सबै टुंग्याउन निर्देशन गरेपछि पोखरेल प्रचण्ड निवास पुगेका हुन् । उनले स्थायी समिति बैठकका विषयमा पनि प्रचण्डसँग समिक्षात्मक छलफल गरेका थिए ।

प्रचण्डले पार्टीभित्रका सबै शीर्ष नेताहरुसँगको परामर्शकै आधारमा अगाडी बढने रणनीति लिएपछि उनले शीर्ष नेताहरुसँग भेटघाट र छलफल पनि बाक्लै गर्दै आएका छन् ।  त्यही क्रममा पोखरेलसँग पनि छलफल भएको हो । प्रचण्ड ४ मंसिर देखि नेकपाको पार्टी काम हेर्ने गरी कार्यकारी जिम्मामा छन् ।