रोनाल्डोको निर्णायक गोलमा अल नासरको जीत

काठमाडौं। पोर्चुगिज सुपरस्टार फूटबलर क्रिस्टियानो रोनाल्डोको निर्णायक गोलमा अल नासरले जीत हासिल गरेको छ । साउदी प्रो लिगअन्तर्गत शुक्रवार भएको खेलमा अल नासरले अल शबाबलाई २–१ गोल अन्तरले पराजित गरेको हो ।

शबाबको घरेलु मैदानमा भएको खेलमा नासरका लागि अर्को गोल स्पेनिस खेलाडी एमेरिक लापोर्टेले गरेका हुन् । लापोर्टेले खेलको ६९ औं मिनेटमा गोल गरेका थिए ।

खेलको अन्तिम मिनेटमा नासरका अली अलहसनले आत्मघाती गोल गरेपछि खेल १–१ को बराबरीमा पुगेको थियो । तर अतिरिक्त समयको सातौं मिनेटमा प्राप्त पेनाल्टीमा गोल गर्दै रोनाल्डोले आफ्नो टोलीलाई जीत दिलाए ।

मोहम्मद सिमकनले रातो कार्ड खाएपछि नासर खेलको अन्तिम समयमा १० खेलाडीमा सीमित भएको थियो । तर शबाबले यसको फाइदा उठाउन सकेन । जीतसँगै नासरले शीर्ष स्थानको साविक विजेता अल हिलालसँगको अंक दूरी घटाएको छ । नासरले हिलालसँगको अंक दूरी ४ अंकमा झारेको हो ।

सात खेलबाट २१ अंक जोडेको हिलाल लिगको शीर्ष स्थानमा छ । दोस्रोमा रहेको नासरको १७ अंक छ । चौथो स्थानमा रहेको शबाबको समान खेलबाट १२ अंक रहेको छ ।

लिगको तेस्रो स्थानमा भने अल इत्तिहाद छ । उसले १५ अंक जोडेको छ ।