सुदूरपश्चिममा मोबाइलको फ्ल्यासलाइट बालेर प्रतिपक्षद्वारा सरकारको खोजी

कैलाली । सुदूरपश्चिम प्रदेशमा प्रतिपक्ष दलहरूले दिउँसै बत्ती बालेर सरकारको खोजी गरेका छन् । आज २ बजेको लागि प्रदेश सभा बैठक आह्वान गरिएको थियो ।तर, सरकारको तर्फबाट कुनै पनि मन्त्री उपस्थित नभएपछि आज बैठक नै नबसी स्थगित भएको छ ।

बाढी पहिरोबाट ठुलो क्षति भएको र त्यहि विषयमा प्रदेश प्रमुखसँग आग्रह गरेर आह्वान गरिएको विशेष अधिवेशनमा पनि सरकार उपस्थित नभएको भन्दै प्रतिपक्ष दलहरू आक्रोशित भएका हुन् ।

कांग्रेस ,एमाले र नागरिक उन्मुक्ति पार्टीले संसद् स्थगित भए लगत्तै प्रदेश सभा परिसरमै मोबाइलको बत्ती बालेर सरकारको खोजी गरेको जनाए ।‘यस्तो अवस्थामा सरकारले जनतालाई राहत दिनु पर्ने हो । तर, सरकार सांसदमै उपस्थित भएको छैन ’ एमाले संसदीय दलका नेता तथा पूर्व मुख्यमन्त्री राजेन्द्रसिंह रावलले भने ‘हामीले सरकारको खोजीको लागि साङ्केतिक रुपमा बत्ती बालेका हौँ । ’

मुख्यमन्त्री दीर्घ सोडारीलाई नैतिकताको आधारमा राजीनामा दिन समेत उनले आग्रह गरेका थिए । कांग्रेसका प्रमुख सचेतक विक्रमसिंह धामीले सरकारले संसद् छलेर हिँडेको भन्दै यस विषयमा आफूहरू गम्भीर रहेको बताएका थिए । संसद्मा उपस्थित भएको भन्दै मन्त्रीलाई बर्खास्त गरेकोमा उनले विराध जनाए ।

‘यस्तो अवस्थामा सरकारका सबै मन्त्री संसद्मा उपस्थित हुनुपर्ने हो उल्टै उपस्थित भएका मन्त्रीहरूलाई पनि बर्खास्त गर्ने सरकारलाई नै बर्खास्त गर्नुपर्छ’ उनले भने । नागरिक उन्मुक्ति पार्टीका सांसद रामेश्वर चौधरीले पनि सरकारले संसद् छलेको भन्दै विरोध गरे । उनले सरकारलाई चाँडै विश्वासको मत लिन वा राजीनामा दिएका थिए ।

२० असारमा एमालेले समर्थन फिर्ता दिएपछि सुदूरपश्चिम सरकार अल्पमतमा परेका छ । तर, मुख्यमन्त्री सोडारीले अहिलेसम्म विश्वासको मत लिने मिति निर्धारण गरेका छैनन् ।