३ वर्षमा हण्डर–ठक्कर खायौं होला, तर विद्रोह सही प्रमाणित भयो: घनश्याम भुसाल

काठमाडौं। नेकपा एकीकृत समाजवादीका महासचिव घनश्याम भुसालले नेकपा एमाले विभाजन गरेर नयाँ दल गठनको निर्णय सही प्रमाणित भएको दाबी गरेका छन् ।कम्युनिस्ट पार्टीको पुनर्गठन र रुपान्तरणका लागि नेकपा एस जन्मिएको उनले बताए ।

समाजवादीको १० औं महाधिवेशनको औपचारिक उद्‌घाटनअघि कार्यकर्तालाई सम्बोधन गर्दै महासचिव भुसालले कम्युनिस्ट आन्दोलन सही दिशातिर अगाडि बढ्दै गरेको बताएका हुन् ।

‘तीन वर्षमा हामीले अनेक उकाली–ओराली र हण्डर ठक्कर खायौं । क्षति व्यहोर्‍यौं होला, तर भविष्य प्रतिको संकल्प भुलेनौं,’ भुसालले भने, ‘हामीले भविष्यमा अझ धेरै हण्डर-ठक्कर खानुपर्नेछ, तर कम्युनिस्ट आन्दोलनले लिनुपर्ने सही दिशातिर अघि बढ्दैछ ।’

महाधिवेशन उद्‌घाटन समारोहमा प्रधानमन्त्री पुष्पकमल दाहाल 'प्रचण्ड', कांग्रेस सभापति शेरबहादुर देउवालगायत उपस्थित छन् ।