कोशी प्रदेशमा सङ्कल्प प्रस्तावमाथि छलफल सुरु

काठमाडौँ । कोशी प्रदेशसभामा नेकपा एमाले र माओवादी केन्द्रले पेश गरेको सङ्कल्प प्रस्तावमाथि छलफल सुरु भएको छ। शुक्रबार बसेको बैठकमा मुख्यमन्त्री केदार कार्की विरुद्धको सङ्कल्प प्रस्तावमाथि छलफल सुरु भएको हो।

छलफलमा नेकपा माओवादी केन्द्रका संसदीय दलका नेता इन्द्रबहादुर आङ्वोले अल्पमतमा परिसकेपछि ३० दिनभित्र मुख्यमन्त्रीले विश्वासको मत लिनुपर्ने नभए राजीनामा दिनुपर्ने धारणा राखे। १६८ को उपधारा ५ अनुसार बनेको सरकार चिरस्थायी हुने कहीँ पनि व्यवस्था नरहेको स्पष्ट पारे।

संवैधानिक इजलासले सरकार चिर स्थायी नहुने दलले मात्रै हैन सांसदले पनि समर्थन फिर्ता लिन पाउने व्याख्या गरेको आङ्वोको दाबी छ। संविधान अनुसार तत्कालै कोशी प्रदेशमा प्रदेशसभा विघटन नहुने उनले जिकिर गरे।

आङ्वोले अल्पमतमा परिसकेका कारणे सहज रूपमा राजनीतिक निकास दिन मुख्यमन्त्रीलाई आग्रह गरे।