यातायात क्षेत्र व्यवस्थित बनाउन प्रदेशका मन्त्रीहरूसँग छलफल गर्दैछु : मन्त्री ज्वाला

काठमाडौँ ।  भौतिक पूर्वाधार मन्त्री प्रकाश ज्वालाले सडक दुर्घटना न्यूनीकरणको प्रयास भइरहेको बताएका छन् । बिहीबार संसद्को राष्ट्रिय सरोकार समितिको बैठकमा सांसदहरूले उठाएका प्रश्नको जवाफ दिँदै मन्त्री ज्वालाले दुर्घटना न्यूनीकरणको प्रयास भइरहेको बताएका हुन् । 

उनले चाडपर्वमा हुने दुर्घटनामा कमी आएको बताउँदै भने– ‘सडक दुर्घटना र सडक सुरक्षाको विषय उठेको छ। दुर्घटनामा धेरैले ज्यान गुमाएका छन् । हामीले दुर्घटना न्यूनीकरणको प्रयास गरेका छौँ। चाडपर्व हुने दुर्घटनामा कमी आएको छ। त्यो भनेको हाम्रो निरन्तर अनुगमनले नै हो।’

दुर्घटना न्यूनीकरणमा सरकार गम्भीर रहेको समेत मन्त्री ज्वालाले बताए । उनले सार्वजनिक सडक ऐन र सडक सुरक्षा ऐन एउटै हुनुहुँदैन भन्ने विषय उठेकाले एउटै ड्राफ्ट बनाएर अर्थ मन्त्रालय पठाइएको उनले बताए  । ‘हामीले सुरुमा ड्राफ्ट बनाएर अर्थमा पठाउँदा एउटै बनाएर पठाऊ भन्यो। हामीले एउटै बनाएर पठाएका छौँ। अहिले धेरै अधिकार प्रदेशमा पनि छ । यातायात क्षेत्र व्यवस्थित बनाउन ७ गते प्रदेशका मन्त्रीहरूसँग छलफल गर्ने भएका छौँ।’

उनले यसका लागि पूर्व सचिवको संयोजकत्वमा कार्यदल समेत बनाइएको बताउँदै यो प्रतिवेदन त्यसै नथन्किने बताए ।  मन्त्री ज्वालाले व्यापारिक कोरिडोरको रूपमा उत्तर दक्षिण कोरिडोरलाई प्राथमिकतामा राखिएको बताए । 

संरक्षित क्षेत्र भित्र के गर्ने भन्ने एउटा कार्यविधि बनाइसकिएको बताउँदै उनले सडक र आवश्यक पूर्वाधार बनाउन त्यसले बाटो खोल्ने बताए ।  त्यसका लागि केही निकायबिच समन्वय अभाव रहेको उनले बताए । 

विकास पनि हुने र जनतालाई सास्ती नहुने विषयमा प्रधानमन्त्री पनि गम्भीर रहनुभएको मन्त्री ज्वालाको भनाइ छ ।