माओवादी घटकहरूको नेतृत्व गरेर लैजानुपर्छ : विप्लव

काठमाडौँ । नेपाल कम्युनिस्ट पार्टीका महासचिव नेत्रविक्रम चन्द विप्लव ६ वर्षपछि गृहजिल्ला रोल्पा पुगेका छन् । जनमुक्ति दिवस र पार्टी पुनगर्ठन दिवसको अवसरमा मंसिर ६ गते उनी रोल्पा पुगेका हुन् ।

राहत र पुनर्निमाणको प्याकेज लिएर भूकम्प प्रभावित क्षेत्र जाजरकोट र रुकुम (पश्चिम) पुगेका उनी रोल्पाली जनताहरूको मनोविज्ञान बुझ्न रोल्पा आएको नेकपाका नेता चन्द्रबहादुर खड्का अस्कलले बताए । उनका अनुसार कार्यकर्ता र जनताले मुख्य रुपमा तीन विषयमा केन्द्रित रहेर सुझाव दिएका थिए । 

‘उहाँ आउनुको मुख्य विषय रोल्पाली जनताको मनोविज्ञान बुझ्नु थियो । जनयुद्धमा सबैभन्दा बढी योगदान रोल्पालीले भूमिका निर्वाह गरेका थिए । नेपाली क्रान्तिको किल्लाको रुपमा रोल्पाको थवाङ र लिवाङलाई लिने गरिन्छ’, विप्लवलाई रोल्पालीले दिएको सुझाव सम्बन्धमा उनले जानकारी दिँदै उनले भने, ‘पहिलो माओवादी घटकहरूको नेतृत्व गरेर लैजानुपर्छ । नेपाली जनताले गरेको बलिदानलाई खेर जान दिन भएन भन्ने छ । दोस्रो विप्लव रोल्पाली भएकाले रोल्पालाई बढी ध्यान दिनुपर्यो । जनताको भावना सुन्नुपर्यो । तेस्रो, घाइते अपाङ्ग, वेपत्ता र सहिद परिवार सबैको सुझाव कार्यान्वयन गर्नुपर्यो । नेपाली जनवादी क्रान्तिको लक्ष्य जनवाद, समाजवाद र साम्यवाद पुग्ने सपना हो । ती सपना कतै न कतै गुम्राहमा परेको जस्तो छ । त्यसमा साम्राज्यवादीहरूले खेले । त्यो सपान मर्न दिन भएन भन्ने छ ।’

६ गते रोल्पा सुलीचौरमा कार्यक्रम गरी उवामा बास बसेका थिए । ७ गते थवाङमा प्रवेश विप्लवले ८ गते जनमुक्ति दिवसको अवसरमा थवाङको कार्यक्रम भाग लिए । ९ गते थवाङमै नेता तथा कार्यकर्तालाई प्रशिक्षण दिए । सोही दिन बाघमारामा कार्यक्रम गरी १० गते घर्तीगाउँको कार्यक्रम सहभागी भए । ११ गते लिवाङमा अन्तक्र्रिया कार्यक्रम गरी सोमबार प्युठान आउने कार्यक्रम रहेको नेता अस्कलले जानकारी दिए । विप्लव यसअघि पार्टीको ८ औं महाधिवेशनमा २०७४ फागुनमा थवाङ पुगेका थिए ।