आगामी बैंशाखमा स्थानीय तहको चुनाव हुन्छ, कुनै बहानामा सार्न मिल्दैन : काँग्रेस महामन्त्री थापा

काठमाडौं । नेपाली कांग्रेसका महामन्त्री गगनकुमार थापाले आगामी वैशाखमै स्थानीय तहको चुनाव हुने बताएका छन् । संचारमाध्यमसंग कुरा गर्दै थापाले संविधान अनुसार वैशाखमा जसरी पनि चुनाव गर्नैपर्ने र त्यसलाई कुनै पनि बहानामा सार्न नमिल्ने बताएका छन् । 

‘विभिन्न कारण देखाएर चुनाव सार्न खोजियो भने त्यो संविधानको अपव्याख्या हुन्छ । हामी त्यसो हुन दिने छैनौं । कांग्रेस वैशाखमा चुनाव गर्ने पक्षमा छ । गठबन्धनलाई पनि त्यसअनुसार तयार गरिन्छ,’ महामन्त्री थापाले भने । 

गठबन्धनमा रहेका केही दलहरूले तत्काल चुनाव नचाहेको भए पनि संविधान अनुसार वैशाखमा स्थानीय तहको चुनाव गर्नैपर्ने उनले बताए । ‘प्रधानमन्त्री वैशाखमा स्थानीय तहको चुनाव गर्ने कुरामा स्पष्ट हुनुहुन्छ । मैले भर्खरै उहाँसँग चुनाव र सरकारका कामको बारेमा विस्तृतमा छलफल गरेको छु । कांग्रेसकै कारण चुनाव सर्छ भन्ने कुरामा सत्यता छैन, त्यो हावादारी हो,’ थापाले भने ।

स्थानीय तह एक दिन पनि जनप्रतिनिधिविहीन नहोस् भन्ने उद्देश्यले संविधान र कानूनमा सोही अनुसारको व्यवस्था गरिएकाले त्यसलाई पालना गर्नुपर्ने थापाले बताए । नेपाली कांग्रेस नेतृत्वको गठबन्धन सरकारको काममा सन्तोष गर्ने ठाउँ नभएको स्वीकार्दै उनले कार्यशैली सुधार गर्न पार्टी सभापति एवं प्रधानमन्त्री देउवालाई सुझाव दिएको उनले बताए ।

यसअघि प्रधानमन्त्री देउवाले कांग्रेसको महाधिवेशन सम्पन्न गराउन लाग्नुपरेकाले सरकारको काममा कम ध्यान गएको र अबको दिनमा देउवाले पार्टीभन्दा बढी सरकारलाई ध्यान दिने थापाले बताए । फरक सन्दर्भमा उनले अमेरिकी सहयोग एमसीसी संसदमा पुगेकाले त्यही विस्तृतमा छलफल गरेर टुंगोमा पुर्‍याउनुपर्ने बताए ।