भारतबाट फर्किनेमा धमाधम कोरोना सङ्क्रमण

काठमाडौं । सुदूरपश्चिम  प्रदेशमा भारतबाट   फर्किने   व्यक्तिमा   बढी   कोरोना सङ्क्रमण देखा परिरहेको छ।  भारतमा  सङ्क्रमण  बढेको  बेला  स्वदेश फर्किरहेका  धेरै  व्यक्तिहरूमा  सङ्क्रमण  देखा पर्न  थालेको  हो। 

यो  प्रदेशको  विभिन्न  नाकाबाट फर्किरहेका  नेपालीहरूको  नाकामै  परीक्षण  गर्ने व्यवस्था  गरिएको  छ।  पछिल्लो  तीन  दिनको तथ्याङ्कलाई हेर्दा सुदूरपश्चिममा फेला पर्ने जम्मा सङ्क्रमितमध्ये ९० प्रतिशतको हाराहारीमा भारतबाटै फर्किने व्यक्ति रहेका छन्।

सुदूरपश्चिम प्रादेशिक स्वास्थ्य निर्देशनालयका अनुसार  शुक्रबार  प्रदेशभरि  १५८  जनामा  कोरोना सङ्क्रमण पुष्टि हुँदा थपिएका ९७ जना सङ्क्रमित भारतबाटै फर्किएका व्यक्ति हुन्। कुल सङ्क्रमितको ६१  दशमलव  ३९  प्रतिशत  सङ्क्रमित  भारतबाट फर्किएका व्यक्ति रहेका जनाइएको छ। गोरखापत्रमा खबर छ ।