बागमती प्रदेशमा नीति तथा कार्यक्रम पास गर्न ओली र माधव पक्षको संयुक्त निर्देशन

हेटौंडा । बागमती प्रदेश सभामा नीति तथा कार्यक्रम पास गर्न केपी ओली र माधव नेपाल पक्षले सांसदहरुलाई संयुक्त निर्देशन गरेका छन् । अन्य प्रदेशमा माधव नेपाल पक्ष र केपी ओली पक्षबीच टकराव सिर्जना भए पनि बागमती प्रदेशमा भने नीति तथा कार्यक्रम पास गर्न एमाले एकढिक्का भएको छ ।

बागमती प्रदेश संसदीय दलको बैठकमा मुख्यमन्त्री डोरमणि पौडेल र माधव नेपाल पक्षकी नेतृ अष्टलक्ष्मी शाक्यले संयुक्त रूपमा नीति तथा कार्यक्रम पास गर्न पार्टीका प्रदेश सभा सांसदहरुलाई निर्देशन दिएका छन् । नेतृ अष्टलक्ष्मी शाक्य निकट प्रदेश सभा सदस्य मुनु सिग्देलले बागमतीको नीति तथा कार्यक्रम पास गर्न बहुमत सदस्य रहेको एमाले एक ढिक्का हुने बताइन् ।

बागमती प्रदेश सरकारले प्रदेश सभामा पेस गरेको नीति तथा कार्यक्रमको पक्षमा मतदान गर्न निर्देशन दिएको दलका मुख्य सचेतक दिपक निरौलाले जानकारी दिए । नीति तथा कार्यक्रम आज बागमती प्रदेशमा निर्णायर्थ पेश हुँदैछ ।