बागमती प्रदेशमा मन्त्रिपरिषद् विस्तारको तयारी, ३ मन्त्री र ७ राज्यमन्त्री थपिने

काठमाडौं । बागमती प्रदेशमा मन्त्रिपरिषद् विस्तारको तयारी गरिएको छ । सत्तारुढ नेकपा एमालेको एकल बहुमत रहेको प्रदेशमा रिक्त रहेका ३ मन्त्री र ७ जना राज्यमन्त्री नियुक्त गर्ने गृहकार्य भइरहेको मुख्यमन्त्री तथा मन्त्रिपरिषद् कार्यालय स्रोतले जानकारी दिएको छ ।

प्रदेशमा मन्त्रिपरिषद् विस्तारको गृहकार्य भइरहेको छ । अब सात जना राज्यमन्त्री पनि थपिने छन्,’ स्रोतले भन्यो, ‘राज्यमन्त्रीका लागि मन्त्रालयहरूमा कार्यकक्ष व्यवस्थापनको काम धमाधम भइरहेको छ ।’ मौजुदा मन्त्रीसमेत रहेका मन्त्रालयहरूमा आइतबारदेखि राज्यमन्त्रीका लागि कार्यकक्षको व्यवस्थापन भइरहेको जनाइएको छ ।

तत्कालीन नेकपा दुई धारमा विभाजित भएपछि १० पुसमा आन्तरिक मामिला तथा कानुनमन्त्री शालिकराम जम्मरकट्टेल, उद्योग पर्यटन वन तथा वातावरण मन्त्री अरुण नेपाल र सामाजिक विकास मन्त्री युवराज दुलालले सामूहिक राजीनामा दिएका थिए ।

तीन मन्त्रीले राजीनामा दिएपछि बागमती प्रदेशका मुख्यमन्त्री डोरमणि पौडेलले तीन वटै मन्त्रालय सम्हाल्दै आएका छन् । अब भने यी तीनवटै मन्त्रालयले नयाँ मन्त्री पाउने भएका हुन् ।  हेटौँडा–२ चौकिटोलस्थित भौतिक पूर्वाधार विकास मन्त्रालयमा राज्यमन्त्रीका लागि कार्यकक्ष तयार भइरहेको छ । मन्त्रालयका प्रवक्ता नवीनकुमार सिंहले राज्यमन्त्रीका लागि कार्यकक्ष व्यवस्था गरिएको जानकारी दिए ।