खैरहनी नगरपालिकाले बनायो बिपद् जोखिम न्यूनीकरण नीति

चितवन । खैरहनी नगरपालिका बिपद जोखिम न्यूनीकरण नीति र खैरहनी नगरपालिका बिपद जोखिम न्यूनीकरण रणनैतिक कार्ययोजनामाथि अन्तिम चरणको छलफल भएको छ ।

इको नेपाल र मेड नेपालले तयार पारेको ती नीति र कार्ययोजनाका बिषयमा जनप्रतिनिधिसँग अन्तिम चरणको छलफल गरी तयार पारिएको सामग्रीलाई पूर्णता दिइएको मेड नेपाल चितवनका कार्यकारी निर्देशक मिनराज भण्डारीेले बताए । नगर प्रमुख लालमणि चौधरीसहित जनप्रतिनिधिहरुको बीचमा नीति र रणनैतिक योजनाका बिषयमा अन्तिम छलफल गरी त्यसलाई पुर्णता दिइएको इको नेपालका अध्यक्ष रामचन्द्र न्यौपानेले बताए । 

छलफलबाट आएका सुझावलाई आधार मानेर दुई दिनभित्रमा रणनीतिलाई सुधार गरेर नगरपालिकामा बुझाउने र त्यो नै नगर बिपत व्यवस्थापन समिति र नगरकार्यपालिकाले स्वीकृति गरेर नगरपालिकामा लागू हुने उनी बताउँछन् ।  खैरहनी नगरपालिका बाढीको हिसावले उच्च जोखिममा रहेको र शितलहर, हुरी बतास, वन्यजन्तुको आक्रमण, चट्याङलगायतमा  १२ वटा प्रकोपको जोखिम रहेकाले ती जोखिम न्यूनीकरणमा कसरी काम गर्न सकिन्छ र त्यसका लागि के गर्दा उपयुक्त हुन्छ भन्ने हिसावले समस्या र समाधानसहित लिखित रुपमा तयार पारिएको सामग्रीमा छलफल गरी त्यसलाई अन्तिम निचोर्ड दिइएको न्यौपानेको भनाइ छ ।

जनप्रतिनिधिका बिचमा छलफल गरी तयार पारिएको नीति र कार्ययोजनालाई नगर बिपत ब्यवस्थापन समिति र नगर कार्यपालिकाको बैठकबाट पास गराएर त्यसलाई प्रयोगमा ल्याइने नगरप्रमुख लालमणि चौधरीले बताए । यसले आफनो नगरलाई दैबिक प्रकोपबाट हुने क्षतिबाट बचाउन निकै ठुलो मद्दत पुग्ने उनको भनाइ छ ।