लकडाउनको कारण बन्द रहेको मनकामना केबलकारले कर्मचारीलाई पुरै तलव दिने

काठमाडौं । चार महिनादेखि बन्द रहेको मनकामना केबलकारले आफ्ना कर्मचारीलाई लकडाउन अवधिको पनि पूरै तलब दिने भएको छ । 

हालको विषम परिस्थिती र कर्मचारीको दैनिक जीविकोपार्जनलाई मध्यनजर गर्दै कम्पनीले सामान्य अवस्थामा आएपछि पुनः हिसाबमिलान गर्नेगरी चार महिनाको सतप्रतिशत तलब दिने निर्णय गरिएको कम्पनीका संचालक राजेशबाबु श्रेष्ठले बताए ।

कतिपय ठूला उद्योग व्यवसायहरुले कोभिड–१९ प्रभावले व्यापार व्यवसाय ठप्प रहेको अवधिको तलब पूरै दिन नसक्ने बताइरहँदा मनकामना केबलकारले भने यस्तो निर्णय गरेको हो । कम्पनीको यो निर्णयले मनकामना केबलकारका १५० जना कर्मचारीलाई राहत मिलेको छ ।

मंगलबार नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्श, नेपाल घरेलु तथा साना उद्योग महासंघ र संयुक्त ट्रेड युनियन समन्वय केन्द्रआवद्ध ट्रेड युनियन महासंघबीच लकडाउन अवधिमा श्रमिकलाई ५० प्रतिशत तलब वितरण गरिने सम्झौता भएको थियो । 

मनकामना केबलकारले भने शतप्रतिशत तलब सुविधा आर्थिक वर्ष २०७६/७७ को हिसाबमा लेखाङ्कन गरिसकेको जनाएको छ ।  यसअघि कम्पनीले कर्मचारीहरुलाई चैत महिनामा कुल तलबको ५० प्रतिशत र वैशाख, जेठ र असारमा ४० प्रतिशत वितरण गरेको थियो ।   

केबलकार तत्काल पुनः संचालनमा आउने अवस्था भने नरहेको श्रेष्ठले बताए । एक जिल्लादेखि अर्को जिल्लामा यातायातको पहुँच नपुगेसम्म सर्वसाधरणलाई मन्दिर दर्शनका लागि आउन गाह्रो भएको श्रेष्ठले बताए । आउँदो कात्तिक–मंसिरदेखि केबलकार संचालनमा ल्याउने योजना छ रहेको उनले बताए ।