थप एक कोरोना संक्रमित फेला, संक्रमितको संख्या १२१ पुग्यो

काठमाडौं । सप्तरी जिल्लामा पनि कोरोना संक्रमित भेटिएका छन् । स्वास्थ्य तथा जनसंख्या मन्त्रालयका अनुसार सप्तरीको डाक्नेश्वरी नगरपालिका वडा नं ३ मा १८ वर्षका युवकमा कोरोना संक्रमण पुष्टि भएको हो ।

स्वास्थ्य मन्त्रालयका सहप्रवक्ता डा। समीर अधिकारीका अनुसार धरानको वीपी कोइराला स्वास्थ्य विज्ञान प्रतिष्ठानमा जाँच गर्दा ती युवकमा कोरोना सं‌क्रमण देखिएको हो ।

आज सोमबार मात्रै एकैदिन ११ जना कोरोनाभाइरसको संक्रमित थपिएका छन् । बिहान मात्र कपिलवस्तुका १० जना व्यक्तिमा संक्रमण भएको पुष्टि भएको थियो ।

योसँगै नेपालमा कोरोना संक्रमितको संख्या १२१ पुगेको छ भने ३१ जना उपचारपछि घर फर्किसकेका छन्। तीमध्ये पनि तीन जनामा पुनः संक्रमण देखिएपछि उनीहरूको उपचार भइरहेको छ ।