अष्ट्रेलियाका नागरिक लिएर सिड्नी आउन लागेका जहाजबाट आफूहरुलाई नेपाल फर्काउन अष्ट्रेलियामा रहेका नेपालीको माग

अष्ट्रेलिया । अष्ट्रेलियामा रहेका नेपालीहरुले नेपाल जाने चाहानाबारे  अष्ट्रेलियास्थित नेपाली दूतावासले नेपाल सरकारलाई जानकारी दिने काम भइरहरेको जनाएको छ । 

आगामी मे महिनाको पहिलो साता नेपालमा रहेका अष्ट्रेलिया र न्युजिल्याण्डका नागरिक एवम् स्थायी बासिन्दाहरूलाई लिएर नेपाल एअरलाइन्सको जहाज अष्ट्रेलियाको सिड्नी आउन लागेको सन्दर्भमा सोही जहाजमा यहाँ रहेका र नेपाल जानैपर्ने अवस्था भएका नेपालीहरूलाई फर्काउनुपर्ने माग अनलाइन पत्रपत्रिका, सामाजिक सञ्जाल, टेलिफोन तथा इमेलबाट प्राप्त भएको र यस्ता अनुरोधहरूलाई राजदूतावासले नेपाल सरकारसम्म पुर्याउने काम गरिरहेको जनाएको हो ।

तर दुतावासले विषम परिस्थितिमा जो जहाँ छ त्यही बस्नु उपयुक्त हुने सुझाव समेत दिएको छ ।

‘यस विषम परिस्थितिमा स्वदेश फर्किने नेपाली नागरिकहरूलाई व्यवस्थापन गर्न पर्याप्त संयन्त्र एवम् स्रोतसाधनको अवस्था, विद्यमान स्वास्थ्य संरचना, स्वदेश फर्किने नागरिकहरूको परिवार एवम् समुदायको स्वास्थ्य जोखिम तथा यस अवस्थामा यात्रा गर्नु त्यति सुरक्षित नहुने जस्ता विषयलाई मनन गर्दै केही समयको लागि धैर्यधारण गरी आफू जहाँ हुनुहुन्छ त्यहीँ सुरक्षित रूपमा रहनुहुन यस राजदूतावास हार्दिक अनुरोध गर्दछ’, दूतावासले बुधबार जारी गरेको अपिलमा भनिएको छ ।

साथै, यस परिस्थितिका कारण कसैलाई खान, बस्नलगायतका अन्य केही समस्या भएमा तत्काल यस राजदूतावासमा र भिसासम्बन्धी जिज्ञासा वा समस्या भएमा अष्ट्रेलियन इमिग्रेसनमा सम्पर्क राख्नुहुनसमेत हार्दिक अनुरोध गरेको छ ।