कर्णाली सरकार र दुई विश्वविद्यालयबीच सम्झौता

सुर्खेत । कर्णाली प्रदेश सरकारले यहाँको नवीनतम् प्रविधिको विकास, अनुसन्धान र समृद्धिका लागि दुई वटा विश्वविद्यालयसँग सम्झौता गरेको छ । भूमि व्यवस्था, कृषि तथा सहकारी मन्त्रालय र मध्यपश्चिम विश्वविद्यालय सुर्खेत तथा कृषि तथा वन विज्ञान विश्वविद्यालय रामपुर चितवनबीच आज राजधानी सुर्खेतमा सो सम्झौता भएको हो ।
प्रदेश सरकारको तर्फबाट भूमि व्यवस्था, कृषि तथा सहकारी मन्त्रालयका सचिव राजेन्द्र भारी र मध्यपश्चिम विश्वविद्यालय सुर्खेतको तर्फबाट निमित्त रजिष्ट्रार यामबहादुर कार्की एवं कृषि तथा वन विज्ञान विश्वविद्यालयको तर्फबाट प्रा डा शारदा थपलियाले उक्त सम्झौता पत्रमा हस्ताक्षर गर्नुभएको छ । कर्णाली प्रदेश सरकारको अर्गा्निक प्रदेश निर्माणका लक्ष्यलाई पूर्णता दिन, विश्वविद्यालयको उपलब्ध जनशक्ति उपयोग गर्न र यहाँको उत्पादन सघाउ हुने गरी नयाँ प्रविधिको विकास गर्न यो सम्झौता कोसेढुङ्गा सावित हुने कृषिमन्त्री विमला केसीले दाबी गर्नुभयो ।

‘विगतको शक्तिशाली राज्य कर्णालीले अरुलाई दिन्थ्यो,’ उहाँले भन्नुभयो, ‘‘अब पनि दिनेगरी कर्णालीको विकासमा सरकार दृढ सङ्कल्पका साथ अघि बढेको छ ।’ कर्णाली सिञ्चित हुन नसकेसम्म खाद्यान्नमा आत्मनिर्भर नहुने अहिलेसम्मका सोच÷लक्ष्य स्वर्गमा जाने तर काम नर्क पुग्नेजस्तै भएको जनाउँदै मन्त्री केसीले भन्नुभयो, ‘विकृति हटाउने र विधिको शासन कायम हुनेगरी नयाँ ढाँचाको विकासमा लाग्छौँ । यसका लागि स्थानीय सरकारले साना, प्रदेशले मmझौला र सङ्घीय सरकारले ठूला पूर्वाधारका योजनाको जिम्मेवारी लिनुपर्छ ।’

कर्णाली प्रदेशका मुख्यमन्त्रीका राजनीतिक सल्लाहकार भीमप्रकाश शर्माले आवश्यकताका आधारमा विकास र त्यहीअनुरुपको अनुसन्धान हुन सकेमात्र सरकार र विश्वविद्यालयबीचको सम्झौताले मूर्तरुप पाउने बताउनुभयो । कृषि तथा वन विज्ञान विश्वविद्यालयका प्रा डा थपलियाले अहिलेसम्मकै इतिहासमा कर्णाली प्रदेश सरकारले विश्वविद्यालयसँग सम्झौता गरेर नयाँ अभ्यास थालेको तर्क गर्नुभयो ।

उहाँले भन्नुभयो, ‘बाहिरका विश्वविद्यालयसँग मात्रै नभएर आफ्नै सरकारसँग हामीमा भएको उपलब्ध स्रोतसाधनको उपयोग गर्नेगरी सम्झौता गरेका छौँ । यसले दिगो विकास र अनुसन्धानमा आधारित विकासमा सहयोग पुग्छ ।’ अनुसन्धानविना विकास हुन नसक्ने भन्दै प्रा डा थपलियाले हामीमा भएको विशेषतालाई बाहिर ल्याउन सकेमात्र देशले लिएको लक्ष्य पूरा हुने दाबी गर्नुभयो । विश्वविद्यालयको ज्ञान, सीपलाई मानव व्यवहारसँग समाविष्ट गर्दै त्यसलाई उत्पादनसँग जोड्नुपर्ने उहाँको भनाइ थियो ।

त्यसैगरी मध्यपश्चिम विश्वविद्यालयका निमित्त रजिस्ट्रार यामबहादुर कार्कीले कर्णाली सरकार र विश्वविद्यालयबीचको सम्झौताले विकासमा नयाँ आयाम थपिने बताउनुभयो । उक्त विश्वविद्यालयका शिक्षाशास्त्र सङ्कायका सहायक डीन विष्णुकुमार खड्काले यो सम्झौताले विश्व बजारमा आवश्यक र प्रदेश सुहाउँदो जनशक्ति उत्पादनमा सहयोग पुग्ने दाबी गर्नुभयो । विकाससँग विज्ञताको ढाँचा लागू गर्नसके हचुवाका भरमा गरिने विकास योजना प्रतिस्थापन हुनुका साथै कर्णाली सरकारको अर्गा्निक प्रदेश निर्माण गर्ने सोच पूरा हुने उहाँको जिकिर थियो ।

कृषि विश्वविद्यालय चितवनका अनुसन्धान निर्देशक नवराज देवकोटाले यो सम्झौताले स्नातकदेखि विद्यावारिधिसम्म अध्यययनरत जनशक्तिले अनुसन्धान, विकास, समृद्धि र प्रदेश तथा राष्ट्रिय अर्थतन्त्रमा सहयोग पुग्ने बताउनुभयो । भूमि व्यवस्था, कृषि तथा सहकारी मन्त्रालयका सचिव भारीले सम्झौताअनुसार सरकारले विश्वविद्यालयका लागि शोधपत्र तयार गर्ने थलोको प्रबन्ध गर्ने, प्रविधिको विकास, पाठ्यक्रम अनुसन्धान जस्ता विभिन्न कार्यमा समन्वय गर्ने बताउनुभयो । सचिव भारीका अनुसार प्रदेश सरकारले दुवै विश्वविद्यालयसँग गरेको सम्झौताको अवधि पाँच वर्ष हुनेछ । (रासस)